Uyali telefon qanday tanlanadi

Uyali telefon qanday tanlanadi

Ushbu maqolada biz qanday qilib yaxshi telefonni tanlash haqida gaplashamiz. Keling, bunda qaysi xususiyatlarga e’tibor berish kerakligini ko‘rib chiqamiz.

Mobil telefonlarning turlari

Avvalo, keling, telefonlarning turlari haqida gaplashib olamiz. Smartfonlar oddiy telefonlarni bozordan chiqarib yuborgandek tuyulishi mumkin, ammo amalda bunday emas. Faqat “allo-allo uchun” bo‘lgan telefonlar hali ham mavjud. Sezganingizdek, gap tugmachali qurilmalar haqida ketyapti.

Tugmali telefonlar korpusning konstruksiyasiga ko‘ra quyidagilarga bo‘linadi:

• Monoblok

• “Raskladushka” (ochilib-yopiladigan)

• Slayder

Monoblok yaxlit korpusga ega bo‘lib, displey hamda klaviatura telefonning old qismini taxminan teng ikkiga bo‘lib turadi. Bunda ekran kichikroq bo‘ladi.

Agar sizga “knopkali” telefon zarur, lekin ekrani kattarog‘ini xohlasangiz, unda “raskladushka” yoki slayderlarni tavsiya qilamiz. Ularning korpusi bir-biriga nisbatan buklanadigan yoki siljiydigan ikkita qismdan iborat. Ushbu dizayn tufayli displey kattalashgan va tugmalar tasodifiy bosilishining oldi olingan. Qaysi telefonni tanlash kerak – ochilib-yopiladigan yoki slayder – buni bir necha marta ochish va yopish orqali bilib olishingiz mumkin.

Sensorli telefonlar faqat monoblok hisoblanadi. Klaviatura kerak bo‘lganda to‘g‘ridan-to‘g‘ri ekranda paydo bo‘ladi va o‘yinlar yoki kontentni ko‘rish paytida uning maydonini “yeb qo‘ymaydi”.

Texnik xususiyatlar
Agar telefonni parametrlariga ko‘ra qanday tanlash kerakligiga qiziqsangiz, demak, siz sotuvchilarning maslahatlariga, internetdagi do‘stlar va foydalanuvchilarning sharhlariga tayanishga odatlanmagansiz. Bundan ko‘ra ongli tanlov qilishni afzal ko‘rasiz. Bunday holda, protsessorni tanlashdan boshlang.

Protsessor

Smartfon – bu shaxsiy kompyuter. Protsessorning sifati uning ish tezligini, bir zaryadda ishlash muddatini va uzoq vaqt davomida qizib ketmasdan ishlash qobiliyatini belgilaydi.

Zamonaviy smartfonlarda odatda to‘rt va sakkiz yadroli protsessorlar qo‘llanadi. Yaqinda bozorda o‘n yadroli protsessorga ega qurilmalar paydo bo‘ldi. Bir vaqtning o‘zida bir nechta ilovadan foydalanish qobiliyati yadrolar soniga bog‘liq.

Operatsion tizim

Smartfonning ishlashi nafaqat protsessorga, balki operatsion tizimga ham bog‘liq. Yaxshi protsessorga ega bo‘lgan kuchli telefonda ham Androidning eski versiyasi o‘rnatilgan bo‘lsa, qurilma “qotib” ishlashi mumkin.

Xotira

Smartfonda operatsion xotira (RAM) hamda ichki xotira mavjud. RAM operatsion tizim tomonidan ishlatiladi. Tez va aniq ishlashi uchun unga kamida 1 yoki 2 GB xotira kerak bo‘ladi.

Ichki xotira 8, 16, 32, 64, 128 GB bo‘lishi mumkin. U foydalanuvchi ma’lumotlarni, shu jumladan foto va video fayllarni saqlashi uchun kerak. Agar siz juda ko‘p suratga olsangiz, telefon tanlashda katta hajmdagi ichki xotiraga ega yoki uni microSD kartalari yordamida kengaytirish imkoniyatiga ega bo‘lgan modellarga e’tibor bering.

Internetga kirish imkoniyati. 4G. 5G

Ilk raqamli aloqa standarti – GSM (2G) dastlab faqat ovozli qo‘ng‘iroqlar va SMSlarga mo‘ljallangan edi. GPRS va EDGE paketli ma’lumotlar uzatish texnologiyalari ikkinchi avlod tarmoqlarining imkoniyatlarini kengaytirdi va telefondan internetga kirish imkonini berdi, lekin ular uchinchi avlod mobil aloqasi (3G) darajasiday ishlay olmaydi. 3G tarmoqlari tomonidan taqdim etilgan ulanish tezligi 20 Mbit/soniyaga yetishi mumkin.

Bugungi kunda mobil aloqaning to‘rtinchi avlodi (4G) dolzarbdir. 4G mobil internet tezligi 3G internetdan 5 karraga tezroq. Ko‘pgina zamonaviy smartfonlar 4G texnologiyasida ishlaydi.

SIM-karta uchun uyachalar

Ishbilarmonlar uchun smartfon tanlashning muhim mezoni ikkinchi SIM-karta uchun slotning mavjudligi hisoblanadi. Ushbu yechim sizga biznes masalalari uchun alohida qurilma sotib olmaslik imkonini beradi.

Displey

Ekranning diagonali smartfonning haqiqiy o‘lchami hisoblanadi. Qaysi smartfon yaxshiroq – katta yoki ixcham – bu faqat foydalanuvchining tanloviga bog‘liq: qulay yoki noqulay.

Filmlar va murakkab o‘yinlar muxlislari katta diagonalli smartfonlarni tanlashadi. Katta diagonal yuqori ekran o‘lchamlarini talab qiladi: kamida HD, FullHD yoki Ultra HD bo‘lsa – nur ustiga a’lo nur.

Kamera

Zamonaviy telefonlardagi kameralar shunchalik yaxshiki, hatto professionallar ham ular orqali rasm yoki kino olishadi. Ko‘pchilik allaqachon katta hajmli kameralardan voz kechib, yaxshi kamerali telefonlarni tanlash haqida o‘ylamoqda. Albatta, smartfon kamerasi ko‘zguli fotoapparat o‘rnini bosa olmaydi. Ammo, agar siz National Geographic uchun emas, balki shaxsiy albomingiz uchun suratga tushirayotgan bo‘lsangiz, zamonaviy telefonlar kamerasi sizni lol qoldirishi mumkin. Asosiysi, tanlovda faqat megapiksellar soniga tayanmaslik – bu fotosurat sifati uchun yagona mezon emas. Do‘konda kamerani sinovdan o‘tkazish yoki internet orqali ushbu telefon orqali olingan suratlarni ko‘rib chiqish yaxshiroqdir.

Batareya

Batareya smartfonlarning yagona zaif nuqtasidir. Qurilmaning bitta quvvatda necha soat ishlashi akkumulyatorning tok sig‘imiga, telefonning ishlash rejimiga, ekran diagonali va tasvir aniqligiga, matritsa turiga va hokazolarga bog‘liq. Agar siz optimal batareya quvvatiga ega mobil telefonni qanday tanlashga qiziqsangiz, foydalanuvchilarning sharhlarini o‘qib, ularning maslahatlariga quloq solganingiz ma’qul.

Ko‘pgina zamonaviy smartfonlarda quvvatni tejash funksiyasi mavjud bo‘lib, batareya quvvati kam qolganida faollashadi.

Foydalanuvchining qiziqishlariga ko‘ra telefonni qanday tanlash kerak

Ushbu qurilmadan qanday maqsadlarda foydalanmoqchi ekanligingizni o‘ylab ko‘ring, shunda qaysi mobil telefonni tanlash yaxshiroq ekanligi aniq bo‘ladi.

Ijtimoiy faol odamlar uchun

Ijtimoiy tarmoqlarda “yashaydigan”lar birinchi navbatda old va asosiy kamera orqali olinadigan suratlarning sifatiga e’tibor berishadi. Shuningdek, ularga yangiliklar tasmasini o‘qish va video tomosha qilish uchun qulay bo‘lgan katta displey ham yoqadi. Sizga 4G tarmog‘ida ishlaydigan va Android operatsion tizimiga ega smartfonni tanlashni maslahat beramiz. Google Play’da adminlar, blogerlar, dizaynerlar va ijtimoiy tarmoqning oddiy foydalanuvchilari uchun juda ko‘p qiziqarli ilovalar mavjud.

Eng faol foydalanuvchilar – bu yetakchi ishlab chiqaruvchilarning flagman modellariga hali puli yo‘q yoshlardir. Shu sababli, ularni kam pul evaziga yaxshi kameraga ega smartfonni topish savoli qiynaydi.

E’tiboringizni Xiaomi Redmi Note 11 smartfoniga qarating. AMOLED matritsali va 2400x1080 o‘lchamli 6,43ʹʹ displeyda video kontent va boshqalarni tomosha qilish yoqimli. Kamera ranglarga mukammal tarzda qayta ishlov beradi, tezda suratga oladi va saqlaydi. LTE (4G) standarti va 5000 mA/soatlik akkumulyator istalgan xohlagan vaqtda va istalgan joyda onlayn bo‘lishingizga yordam beradi. Umuman olganda, Xiaomi arzon narxlarda mukammal sifat ko‘rsatkichlarini taqdim etuvchi xalqparvar brend hisoblanadi.

Sayohatchilar uchun

Har bir inson sayohat paytida suratga olishni yaxshi ko‘radi. Agar siz fotosuratlarni darhol ijtimoiy tarmoqlarga joylashtiradigan bo‘lsangiz, yaxshi kameraga ega smartfonni qanday tanlash haqida o‘ylab ko'ring.

HUAWEI P50 Pro yuqori aniqlikdagi avtofokusli kameraga ega bo‘lib, past yorug‘lik sharoitida ham aniq suratlar oladi. Ultra yupqa va yengil korpus bardoshliligi bilan ajralib turadi, ekran esa o‘ta chidamli. Shunday qilib, ushbu model sizga eng ekstremal ekskursiyalarda yaxshi hamroh bo‘la oladi.

Bolalar va qariyalar uchun

Ushbu ikki toifa foydalanuvchilar guruhini bemalol birlashtirishimiz mumkin. Chunki, ularning ikkalasiga ham juda qimmat smartfon olib berish shart emas, hattoki umuman kerak bo‘lmasligi mumkin. Bobo yoki buvisi smartfonning boy funksionalligidan foydalanmaydi va aynan shu funksionallik bolani o‘qishdan chalg‘itadi. Yaxshisi, asosiy funksiyalarga, tugmalar va displeydagi katta kontrastli raqamlarga hamda baland ovozga ega telefon sotib olish kerak. Asosiy va muhim xususiyat – bu tepadan tushib ketganda bardosh bera oladigan korpusdir.

Ammo zamonaviy bolalar smartfonni xohlashadi va ko‘plab ota-onalar bunga rozi bo‘lishadi – ular o‘z farzandlarining orzularini ro‘yobga chiqarishga tayyorlar. Bolaga smartfonni qanday tanlash mumkin? Qo‘rqmasdan arzonroq modelini tanlayvering.

Ayollar uchun

Ayollar telefonni xususiyatlariga ko‘ra tanlashi dargumon. Agar siz ularga bu borada yordam bermoqchi bo‘lsangiz, quyidagi xususiyatlarga ega modelni qidiring:

• Kichik diagonalli (ayollarning nozik kaftida xavfsiz turishi uchun)
• Yuqori quvvatga ega batareyali (ayollar ba’zida telefonni quvvatlashni unutib qo‘yishadi)
• Yaxshi selfi kamerali
• Bo‘lajak foydalanuvchining manfaatlariga mos keladigan boshqa xususiyatlar

Ammo unutmangki, go‘zal jins vakilalari uchun birinchi o‘rinda gadjetning tashqi jozibadorligi turadi.

Ayrim qizlar Apple gadjetlari deb aqldan ozishadi. Agar sizning juftingiz ulardan biri bo‘lsa, qaysi mobil telefon yaxshiroq ekanligini so‘rashning o‘rniga iPhone’ning so‘nggi versiyasini olavering. Agar siz bu darajadagi smartfonni hozircha olib bera olmasangiz, ularga gul sovg‘a qiling. :)

Xulosa

Bozorda juda ko‘p smartfon ishlab chiqaruvchilar mavjud, ularning har biri o‘z afzalliklari va kamchiliklariga ega. Qaysi telefonni tanlash yaxshiroq ekanligini aniq aytib bo‘lmaydi. Yaxshisi, o‘zingiz uchun muhim bo‘lgan xususiyatlarga e’tibor bering (suratga olishni ma’qul ko‘rsangiz – kameraga e’tibor qarating, video tomosha qilish va o‘qish uchun – displey sifatiga qarang).