Chingiz Aytmatov va Muxtor Shoxonov: Cho‘qqida qolgan ovchining ohi zori

Mana aziz kitobxon, nihoyat siz sog‘ingan va anchadan buyon orziqib kutayotgan kitob nashrdan chiqdi. Sog‘inchlar, intizor kutishlar bejizga emas. Qardosh qirg‘iz va qozoq adabiyotining ikki buyuk ustuni - Chingiz Aytmatov, Muxtor Shoxonovning suhbatlari asosida tartib berilgan mazkur asar o‘zini butun insoniyat taqdiriga daxldor deb bilgan O‘quvchi sog‘inchi uchun arzirli tuhfa.

Kitobda o‘tgan ajdodlar ruhiga hurmat, ular qoldirib ketgan ma’naviy meros va qadriyatlar oldidagi mas’uliyat, kelajak avlod taqdiri, odamzotning tabiat ne’matlariga munosabati, ma’naviy komillik, til va millat uyg‘unligi, Vatan qadri, muhabbatning inson taqdiridagi o‘rni masalalari ko‘ndalang qo‘yiladi.

O‘quvchi kitobni o‘qirkan, suhbatdoshlar qalbidagi og‘riqni o‘zida ham his qiladi. Adabiyotga shunchaki kirib kelmagan, tili, dini va millatidan qat’i nazar ODAMZOT taqdiri, kelajagi uchun qayg‘urgan, kelgusi avlod farzandlarini faqat va faqat baxtli ko‘rmoqni istagan va istaklarini mazkur asar orqali ifodalagan Aytmatovdek, Shoxonovdek iste’dod egalari bizni hamisha uyg‘oq yurak, uyg‘oq ruh bilan yashashga chorlaydi.

So‘nggi marotaba 90 yillarda chop etilgan Chingiz Aytmatov va Muxtor Shoxonovning «Cho‘qqida qolgan ovchining ohi zori» kitobi «Zabarjad Media» nashriyoti tomonidan qayta chop etilmoqda.