Ultrayengil, ultrayupqa va ishonchli – HUAWEI Mate Xs 2

Ultrayengil, ultrayupqa va ishonchli – HUAWEI Mate Xs 2

Huawei kompaniyasi buklama Mate Xs smartfonining apgreydiga ishonch bilan yondashgan. Huawei Mate Xs 2 — bozordagi hozircha kichkina bo‘lgan soha, ya’ni buklama planshetofonlar borasida raqobatlashish uchun ishlab chiqaruvchining ikkinchi urinishi. Bu yerda asosiy raqobatchi esa Samsung Galaxy Z Fold turkumidagi mashhur Koreya smartfonlaridir.

Huawei Mate Xs 2 modelining asosiy xususiyatlari:

• Qualcomm SM8350 Snapdragon 888 4G protsessori – 8 yadroli (1×Cortex-X1 @2,84 GGs + 3×Cortex-A78 @2,42 GGs + 4×Cortex-A55 @1,80 GGs)
• GPU Adreno 660 grafik chipi
• Android 11 operatsion tizimi, EMUI 12 grafik qobig‘i, Google Play servislari yo‘q
• Buklama AMOLED displey – 7,8″, 2200×2480, 424 ppi, 8:9, 120 Gs
• Displey yopilgan holatida – 6,5″, 1176×2480, 19:9
• Tezkor xotira 8 GB, ichki xotira 512 GB, UFS 3.1
• microSD karta uyachasi yo‘q
• NanoSIM-karta qabul qiladi (2 ta)
• Qo‘llanuvchi uyali tarmoqlar: 2G GSM, 3G WCDMA, 4G LTE FDD, 4G LTE TDD
• GPS/A-GPS, Glonass, Galileo, BDS, QZSS, NavIC
• Wi-Fi 6 (802.11a/b/g/n/ac/ax)
• Bluetooth 5.2, A2DP, LE
• NFC
• USB 3.0 Type-C, USB OTG
• 3,5 millimetrlik audiotirqish yo‘q
• Kameralari: 50 MP + 13 MP (kengburchakli) + 8 MP (zum 3×), video 4K@60 fps
• Old kamera 10,7 MP
• Yaqinlashuv va yoritilish, magnit maydoni datchiklari, akselerometr, giroskop, barometr
• Yon qirrada joylashgan barmoq izi skaneri
• Akkumulyatori 4600 mA/soatlik, tezkor quvvatlash – 66 Vt
• O’lchami 157×139×5,4 mm (yupqa qismining qalinligi), yopilgan holatida – 157×76×11,1 mm
• Vazni 255/257 g

Tashqi ko‘rinishi va ishlatish qulayligi

Smartfon jamlanmasining o‘zida 66 vattlik quvvatga ega tezkor zaryadlagich va kabel, shuningdek, himoya g‘ilofi ham bor. Bu g‘ilof qurilma yopilgan holatida kiydiriladi va uning ochilishiga yo‘l qo‘ymaydi. Ya’ni, u smartfonni olib yurishda hmoyalash vazifasini bajaradi, xolos.

Boshqa buklama smartfonlarga solishtirganda Huawei gadjetlarining asosiy o‘ziga xosligi shundaki, ular «ekrani tashqarida qolib» yopiladi, boshqalariga o‘xshab (asosiy) ekrani ichkarida qolmaydi. Korpusning displey bilan bunaqa «o‘ralishi» tufayli smartfon ishlatishga noqulay va ekrani himoyasiz bo‘lib qolishi kerak edi. Ammo texnologiya shunchalik ilgarilaganki, hatto ekran matritsasining buklama qoplami ham o‘ta ishonchli, mustahkam bo‘lib chiqqan!

Biroq bunday konstruktiv yechim behuda tanlanmagan. Avvalo, u ekranning egilishini ravonroq qilish imkonini beradi. Displeyda keskin bukilish hosil bo‘ladigan darajada, xuddi daftar varag‘i kabi buklanishi shart bo‘lmaydi. Qolaversa, boshqa ishlab chiqaruvchilarning buklama smartfonlaridagi kabi, qurilma yopilganida kerak bo‘ladigan qo‘shimcha ekranlarga hojat qolmaydi. Yaxshi o‘ylangan: oxir-oqibatda, qayishqoq ekranlar kelajakda «konvertcha» shaklida buklanuvchi emas, balki ruloncha holida o‘raluvchi bo‘ladi.

Yopilgan holatida Huawei Mate Xs 2 anchagina qalin hamda beso‘naqay ko‘rinadi, ochilganida esa u hayratomuz darajada yupqa va ushlashga qulay. Yoyiq holatida uning asosiy qismi qalinligi — atigi 5,4 mm. Hatto uning og‘ir (250 grammdan oshiq) ekanligi ham unchalik sezilmaydi. Vaznini pasaytirish uchun korpusning bir qismi titan qotishmasidan ishlangan. Natijada esa Huawei Mate Xs 2 o‘zining asosiy raqibi – Galaxy Z Fold3 modelidan nafaqat yupqaroq va yengilroq, balki yana ekran maydoni va tasvir aniqligi bo‘yicha ham undan oldinda.

Korpusning orqa tomonidagi ikkita yarmi charmni eslatuvchi g‘adir-budur material bilan qoplangan. U qo‘lda sirpanib ketmaydi va o‘zida barmoq izi olib qolmaydi. O’z uslubiga ega va hashamdor ko‘rinadi. Bozorga chiqqan smartfonning ikki xili aynan mana shu qismining rangiga (oq yoki qora) ko‘ra o‘zaro farqlanadi.

Kutilganidek, barmoq izi skaneri korpusning yon qirrasidagi o‘chirish-yoqish tugmachasiga o‘rnatilgan. Uning maydoni yetarlicha katta, datchik tez va xatosiz ishlaydi.

Unda asosiy kamera orqali ham selfi olsa bo‘ladi, zero, smartfon yopilganida ekranning bir qismi orqa tomonga o‘tadi va u kameraga tushayotgan tasvirni ko‘rsatib turadi. Agar qorong‘ilikda selfi qilinadigan bo‘lsa, yuzni fotochaqnoq bilan yoritish ham mumkin. Oddiy va dohiyona yechim!

Ekran

Huawei Mate Xs 2 smartfoni diagonaliga 7,8 dyuymlik, 2200×2480 aniqlikdagi qayishqoq AMOLED-displey bilan jihozlangan. Ekranning jismoniy o‘lchamlari 132×149 mm.ni tashkil etadi, nuqtalar zichligi – 424 ppi. Ekran atrofidagi romning qalinligi barcha tomonlarda 4 mm.ga teng. Displeyda kadr yangilanish chastotasi 120 gersga boradi.

Buklanuvchi ekranning yuza qoplamasi plastikdan ishlangan. Qo‘shimchasiga ekranga himoya plyonkasi yopishtirilgan; uni olib tashlash taqiqlangan, ya’ni u ham ekranning bir qismi hisoblanadi. Plyonkaning yuzasi tirnalishlarga chidamli, har holda, tirnoq bilan uni tirnash imkoni yo‘q. Qayishqoq ekran yuzasi jiloli va butun yuza bo‘ylab salgina notekis, buklanadigan joyida esa bilinar-bilinmas burma mavjud (ammo aynan ishlatish nuqtayi nazaridan qaraganda u sezilmaydi).

Kamera

Huawei Mate Xs 2 smartfoni klassik tarzda uchtalik bosh kameraga ega, unda birorta «ko‘zbo‘yamachilikka» o‘rnatilgan biror soxta ob’ektiv yo‘q.

• 50 MP, f/1,8, PDAF, Laser AF (asosiy)
• 8 MP, f/2,4, 81 mm, PDAF, OIS, optik zum 3× (telefoto)
• 13 MP, f/2,2, 120° (kengburchakli)

Kamerani va suratga olishni boshqaruv interfeysi o‘z imkoniyatlariga ko‘ra boshqa Huawei smartfonlaridagi kabidir. Qurilmaning to‘liq ochilishi kamera imkoniyatlariga biror yangilik qo‘shmaydi, ekranda o‘sha-o‘sha kameraga tushayotgan manzara hamda yonida virtual boshqaruv tugmachalari aks etadi. Bu yerda buklama konstruksiyaning yagona foydasi shundaki, smartfonni xuddi noutbuk kabi yarim ochiq holatida biror narsa ustiga qo‘yib, shtativsiz ham suratga yoki videoga tushirish mumkin.

Asosiy kamera fazaviy avtofokusga ega, ammo unda tasvirni optik barqarorlashtirish imkoniyati yo‘q. To‘liq aniqlikda u 50 megapiksellik, yoki piksellarni birlashtirish funksiyasi bilan 12,5 megapiksellik rasmlar taqdim etadi. Bunda ikkinchi holatni – kichikroq o‘lchamli suratga olishni tanlagan ma’qul: bunda rasmga tushirgandan keyin unga ishlov berish, ya’ni kontrastlikni va keskinlikni oshirish mumkin, ularda mayda detallar yaxshiroq aks etadi. To‘liq o‘lchamda olingan suratlarda esa detalizatsiya 50 megapiksellikka mos emas. Bundan tashqari, 12,5 megapiksellik rejimda olinib, keyin ishlov berilgan rasmlarda ranglar aniqroq chiqadi, 50 megapiksellik fotografiyalarda esa binafsha rangga moyilroq bo‘lib qoladi.

Kunduzi kamera juda yaxshi suratga oladi, 12,5 megapiksellik degan nomni oqlaydi, detalizatsiya yuqori, manzaraning yorqin va qorong‘i joylari ham yaxshi aks etadi, demak – matritsaning dinamik diapazoni keng.

Optik zum uch karralik bo‘lsa-da, ekranga 5× zum tugmachasi ham chiqarilgan, bu endi gibrid zum ekani aniq. Har ikkala variantda ham surat smartfon ekranining o‘zida yetarlicha detalizatsiyali ko‘rinadi, ammo kattalashtirib qaraganda, uch karralik zum orqali olingan rasmlarda aniqlik yuqori, albatta. Umuman olganda, uchta kameradan faqat mana shu asosiy modul optik stabilizatorga ega bo‘lib, yaxshi detalizatsiyani ta’minlaydi, ammo suratlarga ishlov berishda keskinlikka o‘ta urg‘u beriladi.

Kengburchakli modulda olingan suratlarda ham ozroq kontrastlik yetishmaydi, ammo kadr markazida detalizatsiya a’lo darajada, chetki qismlarida ham chakkimas. Umuman olganda, bu – biz ko‘rgan eng zo‘r kengburchakli kameralardan biridir.

Tungi syomka rejimi barcha kameralarga tatbiq etilgan, bunda asosiy kamera natijalari hayratga loyiq. Fonni bir xil tusda qoldirish mushkul, u yerda «shovqin»larga qarshi kurash ketgani ko‘rinib turibdi. Lekin umuman tasvir chiroyli chiqadi, qanaqadir mayda detallar bo‘lgan joylarda ham detalizatsiya juda yaxshi. Biroq qolgan ikkita kamera tunda suratga olishga yaramaydi.

Mazkur smartfon soniyasiga 60 kadrlik rejimda 4K video ola biladi, bu – uning maksimum imkoniyati, kamera 8K formatini qo‘llab-quvvatlamaydi. Mavjud maksimal rejim chindanam qoyilmaqom video tushirishni ta’minlaydi – ajoyib detalizatsiya, a’lo darajadagi aniqlik... Hozircha mobil protsessorlar unchalik eplay olmayotgan 8K formatiga xos xususiyatlar shu kameraning o‘zida mavjud.

Huawei Mate Xs 2 kamerasi barqarorlashtirish tizimi bilan 4K@60fps rejimida ravon video olishga qodir va bunda aniqlikni pasaytirishdan ma’no yo‘q. Shuningdek, u soniyasiga 960 kadrgacha chastota bilan Slo-mo (sekinlashtirilgan) video ham tushira oladi. Smartfon tungi videosyomka sifati bilan maqtana olmaydi, ammo videolarda tovush sifatli chiqadi.

Telefon qismi va kommunikatsiyalar

Huawei Mate Xs 2 smartfonida qo‘llangan X60 modemi simsiz tarmoqlarning katta miqdordagi chastotalarini qo‘llab-quvvatlaydi, ular orasida Gigabit LTE (Cat 22, 2500 Mbit/soniyagacha) tarmoq standarti ham bor. Lekin u 5G tarmoqlarini qo‘llab-quvvatlamaydi. Shuningdek, smartfondagi simsiz adapter Wi-Fi 6 (802.11a/b/g/n/ac/ax, 2,4 + 5 GGs), Bluetooth 5.2 standartlarini qo‘llab-quvvatlaydi. Smartfonga NFC moduli ham o‘rnatilgan.

Dasturiy ta’minot va multimedia

Huawei Mate Xs 2 smartfoni Android 11 tizimi asosidagi EMUI 12 interfeysi bilan ishlaydi. Biroq unda Google Play servislari yo‘q, shu bois ayrim ilovalar ishlamaydi, hattoki ularni fayldan o‘rnatsa ham. Interfeys ko‘pchilikka tanish, lekin bu yerda smartfonning o‘ziga xosligidan kelib chiqib, to‘liq ekran rejimiga ravon o‘tish funksiyasi qo‘shilgan. To‘g‘ri, bu faqat kompaniyaning o‘z ilovalarida ishlaydi, ammo ularda kichik ekrandan kattasiga va aksincha o‘tishda dasturlarni yopish talab etilmaydi. Masalan, shu tariqa SMS yoki qayd matnini terish, taqvim bilan ishlash mumkin va hokazo. Bu asosan, standart smartfonlarda ekranda ketma-ket keladigan ikkita ekran bir vaqtning o‘zida katta ekranda aks etishida ko‘rinadi. Ya’ni, mohiyatan bu – oddiy interfeys uchun ikkita qadam, bu yerda esa ular bir vaqtda aks etadi.

Albatta, ochiq turgan ilovalar oynalari bilan ishlash ham juda qulay: ularni surish, kichraytirish, cho‘zish, birini boshqasining ustiga joylashtirish mumkin. Displey stiluslar bilan ham ishlaydi.

Chet ilovalarga kelsak, bu masalada hammasi silliq emas. Masalan, o‘yinlarni bemalol o‘ynash mumkin, ammo, birinchidan, mobil o‘yinlar bu displeyning yuksak aniqligini ko‘tara olmaydi, chunki uning maydoni katta va unda aksariyat o‘yinlarda tasvir xiraroq chiqadi. Ikkinchidan, ekranning yig‘ilgan va yoyilgan holatlari orasida o‘tishlarni o‘yinlar ko‘tara olmaydi, hatto Huawei uchun «qadrdon» bo‘lgan Standoff 2 kabi o‘yinlarda ham. Dastlab ekranda o‘yin binoyidek aks etadi, lekin smartfonni yoyganda, tasvir shunchaki cho‘ziladi va toki o‘yinni o‘chirib-yoqmaguncha shunaqa noto‘g‘ri ko‘rinib turaveradi.

Zamonaviy kinoindustriya o‘ta keng formatda (ko‘proq 16:9 nisbatida, lekin 21:9 nisbatlisi ham uchraydi) chiqarayotgan filmlar bu ekranda tepada va pastda katta qora tasmalar bilan aks etadi. Bu esa ekran maydonining ancha qismini «eb qo‘yadi» hamda katta displeydan foydalanishning qulayligini yo‘qqa chiqaradi.

Mazkur smartfonga stereodinamiklar o‘rnatilgan: yon qirraning yuqori va pastki qismlarida. Ular tovushni baland va toza chiqaradi, ovoz juda baquvvat va ta’sirli. Simli quloqchinlar uchun standart 3,5 millimetrlik audiotirqish yo‘q, ammo umuman quloqchinga uzatiladigan tovushning balandligi va sifati ham diqqatga sazovor. Sozlamalarda kompaniyaning Histen audiotizimining juda ko‘p imkoniyatlari taqdim etilgan.

Samaradorlik

Huawei Mate Xs 2 smartfoni sakkiz yadroli Qualcomm Snapdragon 888 4G (1×Cortex-X1 @2,84 GGs + 3×Cortex-A78 @2,42 GGs + 4×Cortex-A55 @1,80 GGs) chipseti bazasiga qurilgan. Unda grafik protsessor sifatida GPU Adreno 660 tanlangan. Tezkor xotira hajmi 8 GB bo‘lsa, UFS 3.1 standartidagi ichki xotira hajmi — 512 GB. Smartfonda USB OTG rejimida USB Type-C portiga boshqa qurilmalarni ulash mumkin.

5 nanometrlik texjarayon asosida yaratilgan Qualcomm Snapdragon 888 — garchi allaqachon flagman mobil protsessor bo‘lmasa-da, haliyam eng qudratli platformalardan biridir. Smartfon u bilan sintetik testlarda maksimal yuqori natijalarni ko‘rsatadi. Ammo yuqori darajadagi trotling hamda quvvatni juda ko‘p sarflash – ushbu protsessor bazasidagi barcha ilg‘or smartfonlarning umumiy muammosidir. Samaradorlik bo‘yicha bu yerda bilingan kamchiliklar smartfondan real hayotda foydalanishda sezilmaydi. Yuksak talabli o‘yinlarni grafikasini yuqori darajaga sozlab o‘ynaganda ham smartfon qotib qolmasdan ishlaydi, ammo kuchli qizib ketadi.

Qizish

GFXBench dasturida Manhattan 3.1 akkumulyator testining 15 daqiqalik jarayonidan so‘ng smartfon orqa yuzasining issiqlik kamerasida olingan surati quyida keltirilgan.

Qizish qurilmaning yuqori qismida (korpus qalinlashgan joyda) ko‘proq kuzatiladi, bu chipset mikrosxemasining joylashuviga bog‘liq. Issiqlik kamerasi ma’lumotlariga ko‘ra, maksimal qizish 44 darajani tashkil etgan (atrofdagi havo harorati 24 daraja bo‘lganida), bu esa zamonaviy smartfonlar uchun o‘tkaziluvchi ushbu tur testda o‘rtacha ko‘rsatkichdan yuqoridir.

Avtonom ishlash vaqti

Huawei Mate Xs 2 odatiy hajmdagi – 4600 mA/soatlik batareya bilan jihozlangan. Ammo bunday akkumulyatorlar oddiy smartfonlarga qo‘yiladi. Bu yerda esa hatto dinamik yangilanish chastotasi rejimida va yig‘ilgan ekran bilan ham qurilmaning avtonomlik natijalari yuqori emas, hatto yorqinlik 100-130 kd/m² bo‘lsa ham.

Smartfon jamlanmaning o‘zidagi zaryadlagich orqali 1 soatda butkul quvvatlanadi. Simsiz quvvatlash texnologiyasi yo‘q.

Xulosa

Xo‘sh, bu qimmat «raskladushka» nimalarga qodir? Uning ekrani a’lo darajada: brauzerdan qulay foydalanish, matnlar va jadvallar bilan ishlash mumkin. «Burma» unda deyarli sezilmaydi. Korpusi qulay va chiroyli, stereodinamiklar ovozni ajoyib yangratadi, qoyilmaqom 4K-video oluvchi juda yaxshi bosh kamerasi bor.

Ammo tanlangan ilg‘or protsessor bu smartfonga ustunliklardan ko‘ra ko‘proq nuqsonlar qo‘shgan: quvvat sarflashi oqilona emas, tezda trotling qo‘shiladi. Akkumulyator tez zaryadlanadi, lekin xuddi shunday tez quvvat yo‘qotadi ham. Qurilma 5G tarmoqlarini va e-SIM texnologiyasini qo‘llamaydi; bulardan birinchisi Huawei kompaniyasining hozirgi ahvoli bilan izohlansa, ikkinchisi flagman uchun juda g‘alati. Smartfon ko‘p jihatdan oddiy (buklama bo‘lmagan) flagmanlardan ortda, tag‘in ulardan ancha qimmat ham.

Shunga qaramasdan, apparat qiziq va jozibador. Oldingilarida bo‘lganidek, bu qurilma ham qandaydir g‘ayrioddiy jihati bilan ajralib turishni istaydigan qiziquvchilar, giklar va top-menejerlar uchundir. Hozircha bu ommaviy mahsulot emas, ammo dastlabki modelning apgreydi, umuman olganda, muvaffaqiyatli chiqqan.

Narxlar bilan tanishish va buyurtma berish uchun ushbu havolaga o'ting: HUAWEI Mate Xs 2