Avtomat kir yuvish mashinalari yarim avtomatlardan nimasi bilan farq qiladi va qaysi birini tanlagan yaxshi?

Avtomat kir yuvish mashinalari yarim avtomatlardan nimasi bilan farq qiladi va qaysi birini tanlagan yaxshi?

Kir yuvish mashinasini xarid qilish vaqtida odamlar bir joyda ko‘p ikkilanishadi: sal ko‘proq pul sarflab avtomat xilidan olgan ma’qulmi yoki arzonroq yarim avtomat kir yuvish mashinasini olib qo‘yavergan yaxshimi? Tanlovda qiynalmasligingiz uchun ushbu maqolani o‘qib chiqishni tavsiya qilamiz. Unda ikki turdagi kir yuvish mashinasining farqi, ishlashlari hamda xarid qilishdan avval nimalarga e’tibor berish kerakligi haqida aytib o‘tamiz.



Avtomat va yarim avtomat kir yuvish mashinalari orasidagi farq
Ushbu ikki tur mashina o‘zining dizayni hamda ishlash usullari bilan o‘zaro farq qiladi. Yarim avtomat modellar avtomatlariga qaraganda ancha yengil bo‘ladi. Yarim avtomat deb nomlanishining sababi esa, ushbu qurilmada aynan kir yuvish protsessi avtomatlashtirilgan. Qolgan ishlar – suv quyish, uni chiqarish va kiyimlarni quritish jarayonlari esa qo‘lda bajarilishi kerak. Bunday kategoriyadagi mashinalar hamyonbop hisoblanib, uncha qimmat emas va 1.5–2 million so‘m atrofida turadi.


Avtomat kir yuvish mashinasini xarid qilganingizda siz o‘zingizga haqiqiy “dastyor”ni xarid qilasiz. Ushbu mashina kiyimlaringizni o‘zi yuvib, hatto quritib ham beradi. Ularning yana bir plyus tarafi – mebelingizga moslab olishingiz ham mumkin.

Yarim avtomat kir yuvish mashinalarining turlari
Yarim avtomat kir yuvish mashinalari ikki jihatiga ko‘ra farq qiladi: lyuklar soni hamda aylantirish turi bo‘yicha. Lyuklar soniga qarab yarim avtomatlar ikkiga bo‘linadi: bir yoki ikkita lyukli mashinalar. Bir lyukli mashinalar faqat kir yuvish uchun mo‘ljallangan bo‘lsa, ikki lyukli mashinalarda birinchi lyuk kir yuvish, ikkinchi lyuk uni siqish uchun. Bir bo‘lmadan ikkinchisiga olish qo‘lda amalga oshiriladi.


Keyingi konstruktiv farq – bu aylantirish turi. Bu jihatiga ko‘ra ham mashinalar ikki xil ko‘rinishda bo‘ladi: aktivator hamda barabanli. Birinchisida kir yuvish mashinasining pastki qismida joylashgan aktivator aylantirish vazifasini bajaradi. Ikkinchi – barabanli turida esa, yuvish uchun kirlarni bakning o‘zi aylantirib beradi.

Avtomat kir yuvish mashinalarining turlari



Bu turdagi kir yuvish mashinalari quyidagi jihatlari bilan farq qiladi:

Mebelga joylashtirish imkoniyati

Barabanning hajmi va ishlangan materiali

Avtomatik boshqaruv dasturlari soni

Aylantirish tezligi va boshqalar

Yarim avtomat kir yuvish mashinalarini ishlatish bo‘yicha tavsiyalar
Yarim avtomat kir yuvish mashinasi – bu stanokning ishlashiga o‘xshaydigan agregatdir: elementar darajadagi avtomatlashtirish faqat kir yuvish protsessining o‘zini soddalashtirishi mumkin, qolgan barcha jarayonlar mashina egasining qo‘lida bajariladi.

Isitish elementi yo‘q bo‘lsa, mashina korpusini haroratning keskin o‘zgarishi ta’siridan saqlab qolish uchun issiq suvni unga asta-sekin quyish tavsiya etiladi.


Agar mashinada yuvilgan kirlarni aylantirib quritish uchun alohida bo‘lma mavjud bo‘lsa, ya’ni – yuqorida aytganimizdek, uskuna ikki lyukli bo‘lsa, unda barabandagi disbalansning oldini olish uchun kirlarni teng ravishda taqsimlash tavsiya etiladi.

Avtomat kir yuvish mashinalari faqatgina maxsus kir yuvish kukunlarini talab qilsa, yarim avtomat modellar istalgan kir yuvish kukunida ishlayveradi.

Avtomat kir yuvish mashinalarini ishlatish



Ushbu rasmda keltirilgan menyuni barchamiz taniymiz, biroq ular nimani anglatishini hammamiz ham bilmaymiz va eng tez yuvib beradigan rejimga qo‘yib yuboraveramiz. Noto‘g‘ri tanlangan rejimda kiymingiz toza yuvilmasligi yoki uning sifatiga ta’sir qilishi ham mumkin. Ushbu xatoliklarning oldini olish uchun quyida undagi rejimlarni ko‘rib chiqamiz.

Standart rejimlar

Kundalik yuvish. Dasturning davomiyligi qisqa – taxminan 30-60 daqiqa. Bu rejim 1–2 marotaba kiyilgan va uncha kir bo‘lmagan kiyimlarni yuvishda qo‘llanadi. Bunda suvning harorati 40 darajadan oshmaydi. Mutaxassislar ushbu rejimda barabanni to‘ldirmaslikni, ya’ni yarmigacha solishni tavsiya qilishadi.

Oldindan yuvish. Bir vaqtning o‘zida ikkita kirni yuvib beradi (birin-ketin solinadi). Ammo bu rejimda dozatorga yuvish vositasini ikki porsiya quyish kerak bo‘ladi. Juda kir bo‘lib ketgan kiyimlarni yuvishda ishlatiladi.

Intensiv yuvish. Bu funksiya ham juda kir bo‘lib ketgan kiyimlarni yuvishda ishlatiladi. Bunda suv 60-90 darajaga yetadi, yuvish davomiyligi esa 90-120 daqiqaga boradi. Shu sabablarga ko‘ra, bu rejimni nozik (delikat) matoli kiyimlarni yuvishda ishlatib bo‘lmaydi.

Nozik matoli kiyimlarni yuvish. Oldingi muammoning yechimi shu yerda. Bu rejim deyarli barcha zamonaviy mashinalarda mavjud. Ushbu rejimning boshqalaridan farqi – baraban minimal tezlikda aylanadi, bu esa nafis matoga shikast yetkazmaydi va cho‘zib yubormaydi.


Paxta matoli kiyimlarni yuvish. Bu rejim ham juda keng tarqalgan va paxtadan tikilgan kiyim hamda choyshablarni tozalash uchun ishlatiladi. Suv 95 darajagacha isiydi, ba’zi modellarda esa uni o‘zingiz pasaytirishingiz mumkin. Baraban maksimal tezlikda aylanadi.

Sintetik matolarni yuvish. Sintetik va aralash matolar uchun ishlatiladigan yana bir keng tarqalgan rejim. Suv harorati bunda taxminan 60 darajagacha ko‘tariladi.

Jun matoli kiyimlarni yuvish. Ushbu rejimda suvning issiqlik darajasi past bo‘ladi va jundan to‘qilgan matoli kiyimlarni ehtiyotkorlik bilan yuvib beradi.

Qo‘lda yuvish. Juda nozik matolar uchun yana bir dastur. Suv harorati 40 darajadan oshmaydi. Jarayon davomida baraban juda sekin aylanadi.

Tez yuvish. Bu dastur “Kundalik yuvish” rejimiga o‘xshaydi, yagona farqi shundaki, bunisida yuvish jarayoni 30 daqiqagacha davom etadi. Suv 40 darajagacha isitiladi.

Shu bilan asosiy rejimlar tugadi. Ularning barchasi hamma uchun foydali bo‘ladi. Lekin ishingizni yengillashtirib beradigan qo‘shimcha funksiyalarga nima deysiz?

Qo‘shimcha rejimlar

Quritish. Juda qulay funksiya, to‘g‘rimi? Kiyimlarni osish va quritish uchun endi kutish shart emas. Ularni mashinaga solasiz va toza, xushbo‘y hamda butunlay quruq holida olasiz. Ammo, buning salbiy taraflari ham mavjud: ba’zi mashinalar quritish vaqtida shovqin chiqaradi va kiyim matosini yomon holatga olib kelishi mumkin.

Sport. Sport bilan shug‘ullanuvchilar uchun ajoyib variant. Ushbu rejimda nafaqat sport kiyimlarini, balki poyabzallarni ham yuvishingiz mumkin.

Tungi yuvish. Ertalab mashinani ishga tushirib qo‘yib ishga ketishdan qo‘rqasizmi? Kun davomida yuvishga vaqtingiz bo‘lmayaptimi? Unda bu rejim aynan siz uchun! Tunda kiyimlarni yuvishga solasiz va mashina sizning uyqingizni bizmasdan o‘zi yuvib beradi.

Bolalardan himoya. Kichkina bolali oilalar uchun eng kerakli rejim. Ushbu dasturda mashina tugmalari bloklanadi va bola xohlagancha bosganda ham mashina bunga reaksiya bildirmaydi.


Bolalar kiyimini yuvish. Kichkintoy bolali oilalar uchun yana bir kerakli funksiya. Dastur kiyimni yuqori haroratdagi suvda yaxshilab va uzoq chayib beradi, bu sizga kiyimdagi barcha yuvish vositalari qoldiqlarini butunlay yo‘qotish imkonini beradi. Bu chaqaloqlarning nozik terisi uchun juda muhimdir.

Biz faqatgina eng ko‘p ishlatiladigan funksiyalardan bir nechtasini keltirdik. Bunday rejimlar juda ko‘p bo‘lib, qanday maqsadda ishlatishingizga bog‘liq. Kir yuvish mashinasiga ortiqcha pul sarflamaslik uchun yuqoridagilarni yaxshilab o‘rganib chiqing va tanlov vaqtida bularni inobatga oling.

Ushbu ma’lumotlarni sizga ozgina bo‘lsa ham foydasi tegsa, biz juda xursand bo‘lamiz. Yana qanday layfxaklarni bilmoqchisiz, izohlarda yozib qoldiring.

Sizning internet do'koningiz

asaxiy app image
Qo`llab-quvvatlash xizmati
Chat turini tanlang!