Erkin Vohidov: She'rlar to'plami

O'zbekiston xalq shoiri Erkin Vohidovning she'rlarida hayotga, go'zallikka muhabbat, yovuzlikka, tubanlikka nafrat yaqqol sezilib turadi. Ha, bu adib butun bir hayoti davomida ezgulikni, muhabbatni, samimiyatni, tinchlikni ulug'lab, yovuzlikni, jaholatni, urushni qoralagan. Masalan, uning ilk dostoni - "Nido" da insoniyatga og'ir judoliklar, bitmas jarohatlar keltiradigan urush qattiq qoralansa, keyinroq bitilgan "Ruhlar isyoni" dostonida xalqlar, millatlar, dinlar o'rtasidagi nizolar bashariyatga naqadar katta falokatlar olib kelishi teran tasvirlangan. Bu esa shoir ijodida insonparvarlik hamisha bosh mavzu bo'lib kelganligini ko'rsatadi. Shuning uchun ham uning "Tong lavhasi", "Kamtarlik haqida", "Buloq", "Sevgi", "Ona tuproq" kabi qator she'rlaridagi chuqur ma'no go'zal ifodalar, ajoyib tasvirlar bilan uyg'unlashib ketgan. Masalan, shoir turmushdagi oddiygina holatdan - choy suzilayotganda choynakning piyolaga "egilishi", choy ichayotganda inson piyolaning peshonasidan "o'pishi"dan ajoyib
she'r yaratadi:

Garchi shuncha mag'rur tursa ham,
Piyolaga egilar choynak.
Shunday ekan, manmanlik nechun,
Kibr-u havo nimaga kerak?

Kamtarin bo'l, hatto bir qadam
O 'tma g'urur ostonasidan.
Piyolani inson shuning-chun
O'par doim peshonasidan.