Bahrom Ibragimov: Bojxonadagi hayot yo'lim

Savlat to'kib turgan ulkan tog'lardan, adog'i ko'rinmay sollanib yotgan yo'llardan qanchalik uzoqda bo'lmaylik, bizdan bir nafas narida turgandek ko'rinaveradi. Inson hayoti ham aslida shunday. Aqlimizni tanishimiz bilan maktabga, maktabdan oliygohga, oliygohdan esa o'zimizdan yaxshi nom, ezgu amal qoldirish uchun katta hayotga qadam qo'yamiz. Gohi baland, gohi past keladigan butun bir yo'lni bosib, o'zimizdan tog'dek keladigan yaxshi nom va farzandlarimiz faxr bilan yodga oladigan ezgu amallarni qoldirish istagi bilan yashaymiz.
Aziz kitobxon! Qo'lingizda turgan mazkur esselar to'plami ham umrini xalq farovonligi, insonlar manfaati yo'liga bag'ishlagan bojxona faxriysi Bahrom Jo'rayevich Ibragimovning xizmat faoliyati va zimdan ezgu amallar qoldirishiga sababchi bo'lgan sharafli hayot yo'li haqida hikoya qiladi. Bu hayotiy esselar, o'ylaymizki, siz, aziz o'quvchilar qalbidan ham chukur joy egallaydi!