Rohat Qurbonova: Qiz qalbi

Inson zoti bor-Ki, umri davomida o‘z orzu-istaklari, o‘y-hayollari bilan yashaydi. Biroq, orzu-niyat qilish, o‘y surish hammada bir xil kechmaydi, saviyaga yarasha bo‘ladi. Odam qancha farosatli, vijdonli bo‘lsa, u albatta ezgu niyatlarni qalbiga jo qiladi, faqat yaxshilikni istaydi. Aynan, asar bosh qahramoni ham yosh bo‘lishiga qaramay, kattalarday fikr yuritadi, odamlarga, jamiyatga nafi tegishini istaydi, loqayd-beparvolarni, o‘ylab topilgan nomaʼqul urf-odatlarni, befayz turmush tarzini, erkaklardagi salbiy feʼl-atvorlarni qoralaydi. Shu bilan birga, asarda bu yoshgina qizning his-tuyg‘ulari, ko‘ngil kechinmalari, qalb iztiroblari, isyon-u tug‘yonlari, o‘qish-ilm olishga bo‘lgan ishtiyoqi, yuksak orzulari sari intilishlari, yon-atrofdagilariga samimiy munosabati, yuragi tubidagi sof muhabbati jarayonlar ila ifodalanadi. Uning yana bir jihati - xorijiy tillarga, dunyo adabiyotiga, chet el xalqlari hayotiga qiziqishi va hurmati balandligidir. U har qaysi fazilati bilan o‘z tengdoshlariga o‘rnak bo‘la oladi.