Richard Bax: Parvoz zavqi

Har bir inson bolaligida olis osmonga tikilib, bulutlar uzra yuksaklarga parvoz qilishni orzu qiladi. Bu ushaladigan orzu, inson haqiqatan uchishi mumkin. Ikkilanish, shubhalanish, o‘z kuchiga ishonmaslik, irodasizlik kabi oyoqlaridagi zaminga kishanlagan zanjirlarni uzsa, bepoyon kenglik uning qanotlari ostida bo‘ladi. Jonatan Livingston ana shu kishanlardan ozod bo‘ldi va orzu-maqsadlariga yetib, muvaffaqiyatlarga erishdi.

Jonatan Livingston - yuksaklarga parvoz qilishni o‘rgangan baliqchi qush haqidagi kissa ramziy voqeliklar asosida qurilgan bo‘lsada, har qanday o‘quvchini o‘zi kabi tezlikka erishishga, shamol qarshiligini yengishga, mohirlik bilan qanot qoqishga undaydi. Eng muhimi, parvoz zavqini tuyishga o‘rgatadi. Chindan xam, bilimlaring har safar yangilanganda olamni, odamni anglashdan tuyiladigan zavq xam kuchayib, butun vujudingni qamraydi va yana-da ko‘prok, yana-da kengroq bilishga, anglashga chorlaydi.