Ричард Бах: Парвоз завқи

Ҳар бир инсон болалигида олис осмонга тикилиб, булутлар узра юксакларга парвоз қилишни орзу қилади. Бу ушаладиган орзу, инсон ҳақиқатан учиши мумкин. Иккиланиш, шубҳаланиш, ўз кучига ишонмаслик, иродасизлик каби оёқларидаги заминга кишанлаган занжирларни узса, бепоён кенглик унинг қанотлари остида бўлади. Жонатан Ливингстон ана шу кишанлардан озод бўлди ва орзу-мақсадларига етиб, муваффақиятларга эришди.

Жонатан Ливингстон - юксакларга парвоз қилишни ўрганган балиқчи қуш ҳақидаги кисса рамзий воқеликлар асосида қурилган бўлсада, ҳар қандай ўқувчини ўзи каби тезликка эришишга, шамол қаршилигини енгишга, моҳирлик билан қанот қоқишга ундайди. Энг муҳими, парвоз завқини туйишга ўргатади. Чиндан хам, билимларинг ҳар сафар янгиланганда оламни, одамни англашдан туйиладиган завқ хам кучайиб, бутун вужудингни қамрайди ва янада кўпрок, янада кенгроқ билишга, англашга чорлайди.