Ravshan Haqmurod: Hadik

Ko‘zmunchoq! Tilimizda shunday samimiy so‘z bor. Ota-bobolarimizning ko‘zga yaqin, kelishgan farzand-u nabiralariga qarata aytiladigan “Ko‘z tegmasin” iborasini ko‘p eshitganmiz. Ehtimol, shu so‘zdan ilhomlanib O‘zbekiston xalq shoiri Sirojiddin Sayyid ham kitoblaridan birini “So‘zmunchoq” deb nomlagandir.
Adabiyotimizda ham ana shunday o‘sib kelayotgan ko‘rkam nihollarning bog‘ga aylangulik bo‘yi bor. Bu bog‘larning hosili mo‘l bo‘lishini niyat qilib, bir turkum kitoblarni “So‘zmunchoq” rukni ostida nashr etishni reja qildik.
Qo‘lingizdagi to‘plamda shoirning so‘z bilan yuzma-yuz suhbati, iztirob va kuch, ojizlik va sabr o‘rtasidagi murosasi mujassam. Uning satrlarida ko‘zimiz ko‘rayotgan manzaralar, kundalik hayotning oddiy ko‘rinishlari falsafaga aylanib boradi.
To‘plam o‘tmish va bugun, yo‘lga chiqishga shaylanayotgan beg‘ubor qalb va chin tuyg‘ulardan uzoqlashib borayotgan insoniyatni ogohlikka chorlasa, ne ajab. Ishonamizki, shoir she’rlari qisqa fursatlarda she’rxon yuragidan makon topadi.