Rahmatulloh qori Obidov: Allohning go'zal ismlari va ismi a'zam

Allohning madadi va ilhomi bilan barcha kamchiliklarni hisobga olib, qo‘lingizdagi asarda ulamolar eʼtiroziga sabab bo‘lgan nuqsonlarni tuzatishga, kitob shaklini ham anʼanaviy, ilmiy shaklda tuzishga, har bir maʼlumotni Qurʼon oyatlari va Payg‘ambarimiz sollallohu alayhi vasallamning sahih hadislari bilan asoslab berishga harakat qilingan. Ulamolarning maslahatlari va tavsiyalarini qabul qilgan holda, duolar majmuasi yana-da boyitildi, mukammallashtirildi, boblari tartibga solindi. Hosil bo‘lgan majmua «Allohning go‘zal ismlari va ismi aʼzam» deb nomlandi.

Zikr va duodan murod Alloh roziligiga erishish, Alloh roziligiga erishishdan murod abadiy jannatdir. Shunga ko‘ra, ushbu kitob jannatga qiyos qilib sakkiz bobdan iborat shaklda tuzildi. Ushbu kitobning birinchi bobi «Zikrning fazilati», ikkinchi bobi «Qurʼon tilovatining fazilati», uchinchi bobi «Farz namozlarining fazilati», to‘rtinchi bobi «Nafl namozlarining fazilati», beshinchi bobi «Haj va umraning fazilati», oltinchi bobi «Mustajob duoning shartlari», yettinchi bobi «Duo insonning Alloh bilan aloqasidir», sakkizinchi bobi «Tasbehlar va salavotlar» deb ataladi. Natijada, ommaga ham, ziyolilar va ulamolarga ham maqbul bo‘ladigan bir mukammal, ilmiy asar yuzaga keldi.