Раҳматуллоҳ қори Обидов: Аллоҳнинг гўзал исмлари ва исми аъзам

Аллоҳнинг мадади ва илҳоми билан барча камчиликларни ҳисобга олиб, қўлингиздаги асарда уламолар эътирозига сабаб бўлган нуқсонларни тузатишга, китоб шаклини ҳам анъанавий, илмий шаклда тузишга, ҳар бир маълумотни Қуръон оятлари ва Пайғамбаримиз соллаллоҳу алайҳи васалламнинг саҳиҳ ҳадислари билан асослаб беришга ҳаракат қилинган. Уламоларнинг маслаҳатлари ва тавсияларини қабул қилган ҳолда, дуолар мажмуаси янада бойитилди, мукаммаллаштирилди, боблари тартибга солинди. Ҳосил бўлган мажмуа «Аллоҳнинг гўзал исмлари ва исми аъзам» деб номланди.

Зикр ва дуодан мурод Аллоҳ розилигига эришиш, Аллоҳ розилигига эришишдан мурод абадий жаннатдир. Шунга кўра, ушбу китоб жаннатга қиёс қилиб саккиз бобдан иборат шаклда тузилди. Ушбу китобнинг биринчи боби «Зикрнинг фазилати», иккинчи боби «Қуръон тиловатининг фазилати», учинчи боби «Фарз намозларининг фазилати», тўртинчи боби «Нафл намозларининг фазилати», бешинчи боби «Ҳаж ва умранинг фазилати», олтинчи боби «Мустажоб дуонинг шартлари», еттинчи боби «Дуо инсоннинг Аллоҳ билан алоқасидир», саккизинчи боби «Тасбеҳлар ва салавотлар» деб аталади. Натижада, оммага ҳам, зиёлилар ва уламоларга ҳам мақбул бўладиган бир мукаммал, илмий асар юзага келди.