Oskar Uayld: Dorian Greyning portreti (qattiq)

Dorian Grey kim o‘zi?

O‘tgan asrda kitobxonlar uni adolatli jazoga tortilgan, vasvasaga berilgan gunohkor deb eʼtirof etdilar.

Bugungi kun o‘quvchisi esa Dorian Greyni butun borlig‘ini, qalbini, ruhini abadiy yoshlik uchun qurbon qilgan takabbur, ayni paytda nochor va zaif qahramon sifatida tanidilar.

Kiborlar oilasida dunyoga kelgan, onameros husni tavajjuh egasi bo‘lgan Dorian baxtli-saodatli yashashi uchun yetarlicha imkoniyatga ega bo‘lgani holda taqdirning beshafqat hukmi bilan yuzma-yuz keldi.

«Go‘zal narsaning ortida hamisha biron bir fojia yashirinib yotadi. Eng kamsuqum, eng arzimas bir gulning gullashi uchun ham dunyolar to‘lg‘oq azobini boshdan kechirmoqlari zarur», deydi asar qahramonlaridan biri.

Darhaqiqat, Dorian Greyning go‘zal siymosi ortida ham ul­­kan fojia yashirinadi: qalb o‘ladi, ruh mangu yo‘qoladi. Iflos ishratxonalar, davomiy maishatlar, o‘g‘rilik, jamiyatdagi qalang‘i-qasang‘ilarning qabihligi endi uning xayolida go‘zallikka, bunday razolatlar esa doimiy ehtiyojga aylanadi.

Oskar Uayld adabiyotga ana shunday murakkab tabiatli qahramon timsolini olib kirdi va u orqali inson xohish-istaklarining chegarasini, hayotiy muvozanatning buzilishi qanday oqibatlarga olib kelishini yuksak badiiy mahorat bilan ko‘rsatib berdi. Va asar millionlar qalbini zabt etdi, Dorian Grey obrazi esa kitobxon qayd daftariga bitildi.