Nabi Jaloliddin: Cho’lpon 2-kitob (Tegirmon)

Nuroniylarimiz duoga ko‘l ochib, o‘t va suv balosidan, shu bilan bir qatorda tuhmat balosidan asrashini so‘rashi bejiz emas. “Cho‘lpon” romani qahramonlarining boshiga tushganlaridan voqif bo‘lar ekansiz, bu tilak nechog‘lik muhimligini anglaysiz. Boshiga jamiki balolar yog‘dirilgan millat maʼrifat-parvarlari taqdiriga achinasiz. Kitobning ayrim satrlarini bo‘g‘zingizda alam, ko‘zingizda yosh bilan mutolaa qilasiz. Hatto ularning noto‘g‘ri qarorlarini ham tushunishga harakat qilasiz. Qo‘lingizdagi mazkur “Cho‘lpon” romanining ikkinchi kitobi siz, aziz o‘quvchilarni tariximizning eng mazlum sahifalari bilan tanishtiradi. Asar mutolaasi Vatan ozodligi ulug‘ neʼ- matligini yana bir bor anglashga undaydi, uning yo‘lida ne-ne jasur va mard o‘g‘lonlar o‘z jonini nisor qilgani mutaassir qiladi va yurtni eʼzozlashga naqadar burchli ekanimizni yana bir bor eslatadi.