Mahmud Hasaniy: Tabobat durdonalari

«Tabobat durdonalari» nomini olgan bu nashrga «Hakimlar hikoyati» va «Tabobat xazinasi durdonalaridan» kitoblarining keyingi nashrlari to‘ldirilgan holda kiritildi. Kitobni nashrga tayyorlashda kitobxonlardan tushgan takliflar eʼtiborga olinib, u birmuncha mukammallashtirildi. Chunonchi, izohlar kengaytirildi, dorivor moddalar nomi arab, fors, o‘zbek va rus tillarida berildi. Bu esa shu dorivor moddalar haqida maʼlumot olishni osonlashtiradi. Kitobdagi dorivor moddalarga keng izoh berish kitob hajmini kengaytirib yuborar edi. Shu bois ular haqida to‘laroq maʼlumot olish oson bo‘lsin degan niyatda har bir dorivor moddaning Ibn Sino va Beruniyda uchraydigan raqamlarini ko‘rsatib bordik. Bundan tashqari, kitob nihoyasida dorivor moddalar hamda kasallik nomlari ko‘rsatkichi ilova qilindi.

Bu ham o‘quvchiga kitobdan foydalanishni osonlashtiradi. Masalan, halila degan nom kitobning o‘n yerida uchraydi. Biz faqat bir joyda izoh berganmiz. Qolgan yerdagisini o‘quvchi bilmasligi mumkin. Shunda u kitob oxiridagi «Dorivor moddalar ko‘rsatkichi»ga qaraydi va “h” harfini topib, u yerdan halilani qidiradi va izohni osongina topadi. O‘lchov birliklari jadvali ham kitob oxirida berildi.

Mahmud Hasaniy