Маҳмуд Ҳасаний: Табобат дурдоналари

«Табобат дурдоналари» номини олган бу нашрга «Ҳакимлар ҳикояти» ва «Табобат хазинаси дурдоналаридан» китобларининг кейинги нашрлари тўлдирилган ҳолда киритилди. Китобни нашрга тайёрлашда китобхонлардан тушган таклифлар эътиборга олиниб, у бирмунча мукаммаллаштирилди. Чунончи, изоҳлар кенгайтирилди, доривор моддалар номи араб, форс, ўзбек ва рус тилларида берилди. Бу эса шу доривор моддалар ҳақида маълумот олишни осонлаштиради. Китобдаги доривор моддаларга кенг изоҳ бериш китоб ҳажмини кенгайтириб юборар эди. Шу боис улар ҳақида тўлароқ маълумот олиш осон бўлсин деган ниятда ҳар бир доривор модданинг Ибн Сино ва Берунийда учрайдиган рақамларини кўрсатиб бордик. Бундан ташқари, китоб ниҳоясида доривор моддалар ҳамда касаллик номлари кўрсаткичи илова қилинди.

Бу ҳам ўқувчига китобдан фойдаланишни осонлаштиради. Масалан, ҳалила деган ном китобнинг ўн ерида учрайди. Биз фақат бир жойда изоҳ берганмиз. Қолган ердагисини ўқувчи билмаслиги мумкин. Шунда у китоб охиридаги «Доривор моддалар кўрсаткичи»га қарайди ва «ҳ» ҳарфини топиб, у ердан ҳалилани қидиради ва изоҳни осонгина топади. Ўлчов бирликлари жадвали ҳам китоб охирида берилди.

Маҳмуд Ҳасаний