Homid Ahmad Tohir: Rasululloh sollalohu alayhi vasallamning yoshlarga nasihatlari

Olamlarning Robbi Alloh taologa O‘zining ulug‘ligiga loyiq hamdu maqtovlar bo‘lsin!

Insoniyatga hidoyat yo‘lini ko‘rsatish uchun yuborilgan eng so‘nggi payg‘ambar – nabiyyimiz Muhammad Mustafoga, u zotning ahli oilalari, sahobalari va mo‘min-musulmon ummatlariga Alloh taoloning salotu salomi, to‘xtovsiz rahmati bo‘lsin! Muqaddas va barkamol dinimiz Islomda jamiyatda yashovchi barcha insonlarning haq-huquqlari, burchlari o‘zining aniq va to‘la-to‘kis ifodasini topgan. Islom shariatida hech kimning manfaati va huquqlari o‘zgalarning haq-huquqini poymol qilish yoxud qisqartirish hisobiga amalga oshirilishiga yo‘l qo‘yilmaydi. Jumladan, yoshlar va o‘smirlarning haq-huquqlari ham shunday.

Tarixga nazar soladigan bo‘lsak, Islom ummatining shakllanishida, hidoyat nurining butun olam uzra keng tarqalishida Payg‘ambarimiz sollallohu alayhi vasallam bilan yelkadosh bo‘lgan yosh va navqiron sahobalarning hissalari katta ekani ravshanlashadi. Rasululloh sollallohu alayhi vasallam baʼzan katta-katta qo‘shinlarning harbiy qo‘mondonligini anchagina yosh sahobalarga topshirganlari ham yoshlarga yuksak ishonch va ehtirom namunasi edi. Musulmon yoshlar barcha sohalarda ummatning eng peshqadamlari bo‘lib kelishgan. Bular sharʼiy yoxud dunyoviy ilmlar bo‘ladimi, go‘zal xulq va madaniy jabhalar bo‘ladimi yoki ijtimoiy-iqtisodiy, siyosiy-harbiy soha bo‘ladimi, farqi yo‘q. Bu musulmon yoshlarning ulug‘ marralarni zabt etishida esa Nabiyyimiz sollallohu alayhi vasallam bergan tavsiyalarga qatʼiyat va sabot, chuqur ishonch va ixlos bilan amal qilishgani hal qiluvchi omil vazifasini bajargan. Nabaviy o‘gitlarga og‘ishmay amal qilingan har bir davrda jamiyat mislsiz taraqqiyotga, go‘zal munosabatlar tizimiga ega bo‘lgan, kishilar o‘rtasida mehr-muruvvat, o‘zaro ko‘maklashish va birdamlik ruhi qadriyat darajasida qaror topgan. Ana shu tarixiy jarayonda shakllangan go‘zal qadriyatlar mevasidan hali-hanuz bahramand bo‘lib kelmoqdamiz. Holbuki, boshqa jamiyatlarda kuchli diniy asoslarning yetishmasligi ortidan maʼnaviy va ruhiy inqiroz kelib chiqib, tobora chuqurlashib borayotganini bugun har birimiz ko‘rib, guvohi bo‘lib turibmiz. Ammo bu – bizning jamiyatimizda bugun shaxslararo, oilaviy yoxud umumijtimoiy muammolar, maʼnaviy pasayishlar kuzatilmayapti degani emas. Bu ham ko‘z o‘ngimizdagi ochiq-oydin haqiqat. Buning taʼsiri, ayniqsa, yoshlarda qattiqroq sezilmoqda, bugun ular har doimgidan ko‘ra ko‘proq eʼtiborga, to‘g‘ri yo‘l ko‘rsatishga muhtoj bo‘lmoqda.

Ushbu moʻjaz risolada Rasululloh sollallohu alayhi vasallamning musulmon yoshlarning chinakam islomiy yuksak sharaf sohibiga aylanishi uchun bergan tavsiyalari jamlangan bo‘lib, ushbu Nabaviy nasihatlardan xabardor bo‘lish va ularni shaxsiy hayotida tatbiq etish har bir yoshning, xususan, yurtimizda yashayotgan mo‘min-musulmon farzandlarimizning sharafli vazifalaridir.

Alloh taolo ushbu ojizona urinishimizni manfaatli qilishini so‘rab, duo qilib qolamiz.
Ehtirom ila tarjimonlar Abdulhamid Zayriyev, G‘iyosiddin Habibulloh