Ense Russo, Reks Staut: Mafiya a’zosining iqrori, Oshxonadagi qotillik

Poyezd va avtomobilda yurishdan, kemada suzishdan qo‘rqqani sabab xonasidan hech qayerga chiqmay jinoyatlarni fosh qilgan detektivni bilasizmi? Bu amerikalik yozuvchi Reks Stautning qator qissalari qahramoni Niro Vulfning aynan o‘zginasi. To‘plamga kirgan "Oshxonadagi qotillik" qissasi bosh qahramoni ham u. O‘tkir aql, keng tasavvur, o‘ta sinchkovlik, voqealarni bir-biriga bog‘lash va ularni tahlil qilish natijasida izquvar haqiqiy qotilni aniqlaydi. Eng qizig‘i , qahramon o‘z xizmati evaziga mashhur oshpaz hammadan sir tutgan tansiq taomning retseptini so‘raydi. Niro Vulf bu orzusiga erishadimi yoki yo‘q, kitobxon "Oshxonadagi qotillik" qissasini o‘qib bilib oladi.

Mazkur to‘plam detektiv janrida yozilgan yana bir asarni o‘z ichiga oladi. Italiya yozuvchisi Ense Russoning "Mafiya aʼzosining iqrori" romanida Jovaninoning boshidan kechirganlari bayon qilinadi. Jovanino o‘smir chog‘ida to‘daga qo‘shilganidan boshlab, mafiya aʼzolari bitta- bitta qo‘lga olingunga qadar bo‘lgan davr ichida ko‘rgan-kechirganlarini, qilgan jinoyatlarini o‘z tilidan hikoya qiladi. Yoshi ellikdan oshgan sobiq mafiya aʼzosining afsus va nadomatga to‘la iqrori zamirida o‘quvchi Italiya hayotida mavjud bo‘lgan o‘tkir ijtimoiy muammolarni ham ko‘radi.