Abdulmannon Abdulloh: Zakot kitobi (Zakotga oid fatvolar)

Alloh taologa hamdu sanolarimiz, Allohning Rasuli hazrati Muhammad Mustafo sollallohu alayhi vasallamga durudu salavotlarimiz bo‘lsin!

Zakot ibodati - har bir inson uchun dunyo va oxirat saodatiga erishish yo‘lini ko‘rsatib bergan dinimizning besh ruknidan biri bo‘lib, inson hayotining moliyaviy, moddiy jabhasiga oid ilohiy farmondir, yetarli darajada mol-mulki bor har bir mo‘min-musulmonning zimmasidagi buyuk sharaf hamda ulkan masʼuliyatdir. Zakot ibodatining sharofati bilan jamiyatda fayz-baraka, farovonlik, tenglik, mehr-muruvvat mustahkamlanadi, yetim-yesirlar, beva-bechoralar, faqir-miskinlarning moliyaviy ahvoli yaxshilanadi.

Alloh subhanahu va taoloning inoyati bilan xalqimiz istiqlolga erishib, o‘zligini anglamoqda, diniy va milliy qadriyatlarini tiklamoqda, yurtimizda tarixiy ijtimoiy-iqtisodiy islohotlar olib borilmoqda.

Ushbu ijobiy o‘zgarishlarning natijasi o‘laroq, dinimizning arkonlarini birin-ketin o‘rganib, ularga amal qilayotgan mo‘min-musulmonlarimizdan endi moliyaviy ibodatlar haqida ham tobora ko‘proq savollar kelib tushmoqda.

Ayni paytda, ushbu savollardan ko‘pchilik orasida zakot, fitr sadaqasi, xayr-ehson kabi moliyaviy ibodatlar borasida baʼzi noto‘g‘ri tushunchalar, xato tasarruflar bo‘layotgani ham maʼlum bo‘lmoqda. Bu esa dinimizning moliyaviy ibodatlar borasidagi taʼlimotlarini tartib bilan o‘rganish, ularning asl mohiyatini, tartib-qoidalarini, ilohiy hikmatlarini, uxroviy ajru savoblari hamda bu dunyodagi barakoti va samaralarini xalqimizga yana-da kengroq, batafsilroq tushuntirib, yetkazib berish lozimligini ko‘rsatmoqda.

Shu munosabat bilan zakotning nisobi, qanday mol-mulklardan berilishi, tilla va kumush, chorva, ekin va shu kabilardan beriladigan zakot miqdori, kimlarga berilishi, kimlar zakot olmasligi va shu kabi ko‘plab mavzularga oid savollarga javob topish mumkin bo‘lgan mazkur risolani kitobxonlarga taqdim qilishni niyat qildik.

Kitobxonlarga qulay bo‘lishi, shuningdek, zakotga oid o‘zlarini qiziqtirgan savollarga oson javob topishlari uchun risola asosan savol-javob shaklida tayyorlandi.