Abdulkarim Hasan: Project management yoki loyihalar boshqaruvi

Qo‘lingizdagi risola loyihalar boshqaruviga bag‘ishlangan kitoblardan farq qiladi. Unda shu mavzudagi darslik va qo‘llanmalarda, odatda, yoritilmaydigan va amaliyotda duch kelish mumkin bo‘lgan boshqa jihatlar qalamga olingan. «Startap», ishlanma, loyiha kabi ilgari tor doirada mutaxassislar tomonidan qo‘llangan so‘zlar hozir ommalashgan. Har uchinchi odam shulardan biriga to‘qnash keladi, nimani anglatishi va nima uchun kerakligi haqida bosh qotiradi, ilmiy-nazariy asoslarini o‘rganadi. Ammo shunday bo‘lsada, deyarli barcha sohada katta va kichik loyihalar amalga oshirilayotganiga qaramay, bu loyihalarni yuqori mahorat bilan boshqara oladigan xodimlar taqchilligi ko‘zga tashlanmoqda.

Bizda oliygohlarda ham bu yo‘nalishda kerakli darajada bilim berilmayapti. Aslida boshqaruv ilmi juda kerakli, nozik va hal qiluvchi ahamiyatga ega. Aynan boshqaruvni qay darajadaligi biror soha, tashkilot yo davlatning taraqqiyoti yoki tanazzulini belgilaydi.

Qo‘lingizdagi risolaning dunyoga kelishiga tanazzuldan qo‘rqish, taraqqiyotga intilish va oz bo‘lsada yordam ko‘rsatish niyati sabab bo‘ldi. Kattayu kichik loyihalarni adolat va mohirlik bilan boshqara oladigan mutaxassislarni yetkazib berish har bir mamlakat uchun dolzarb masaladir. Aks holda, ajratilgan mablag‘lar noo‘rin sarflanaveradi, olinayotgan ichki va tashqi qarzlarni to‘lash muammosi ko‘payaveradi. Bu esa kelajakda bizning farzandlarimiz, nevaralarimiz farog‘atda yashash va rivojlanishi o‘rniga qarz uzish uchun ishlashlariga olib keladi.

Kuzatuvlarim mahoratli boshqaruv xodimlariga bo‘lgan talabni endi faqat oshib borishini ko‘rsatmoqda. Faqat turg‘un, rivojlanmay bir joyda qotib qolgan sohalardagina ularga talab bo‘lmasligi mumkin. Risolada bo‘lajak mutaxassislarga qanday qilib shu sohada yetuk mutaxassisga aylanish mumkin degan savolga hayotda ko‘rgan va boshimdan o‘tkazgan voqealar asosida javob berishga harakat qilaman. Yana loyihalar boshqaruvidagi nozik qirralar, kutilmagan vaziyatlarga to‘g‘ri reaksiya, tezkor, ammo to‘g‘ri qaror qabul qilish bo‘yicha ham bilganlarimni siz aziz kitobxonlar bilan o‘rtoqlashaman.

Risolada yo‘l qo‘yilgan xato va kamchiliklar uchun oldindan uzrimni qabul qilasiz, degan umiddaman. Agar ushbu risoladan o‘zingizga biror foyda topa olsangiz, kaminaning o‘tgan ajdod-avlodlari ruhiga duo o‘qib, savobini bag‘ishlaysiz degan umiddaman!