Abdulkarim Hasan: Jamiyat tanasiga tushgan qurt

MUQADDIMA

Odam ko‘p narsaga ko‘nikadi deydilar. Ammo bu ko‘nikish xislati illatlarga nisbatan ham odatga aylansa, bundan yomoni yo‘q. Chunki illatni o‘zi uchun hayot tarziga aylantirgan odam, avvalo o‘zini va yon-atrofdagilarni zalolatga boshlashi tayin.

Ushbu risolada bugungi kunda ko‘p bor tilga olinayotgan poraxo‘rlikka inson o‘z tabiatida ko‘nikib qolishi nimalarga olib kelishini, bu illat urchigan joyda taraqqiyot bo‘lmasligi, odamlarning bunday jirkanch illatga befarq bo‘lib borishlarining ziyon-zahmati, aslida, hech kimni chetlab o‘tmasligi haqida so‘z yuritmoqchimiz.

Ushbu risolani yozishimga poraxo‘rlikning tobora keng kuloch yoyib borayotganidan ham ko‘ra odamlarda unga nisbatan ko‘nikma hosil bo‘la boshlayotgani turtki bo‘ldi. Bu poraxo‘rlikning o‘zidan ham ko‘ra qo‘rqinchliroq, jirkanchroq illatdir. Befarq odam «menga nima» deya butun boshli jamiyat, millatni tanazzulga uchratadi, halol va harom mezonlarini aralashtirib yuboradi, yomonlik va yomonlarning gullab-yashnashiga hissa qo‘shadi.

Risoladan maqsad — har birimiz qalbimizdagi shu befarqlik, miyamizdagi mudroqlikni quvish, uyg‘oq odamga aylanish. Bu bir qarashda ko‘ringani kabi qiyin emas. Bolalikdan aytib kelingan halollik tamoyillariga, insof va adolat mezonlariga amal qilish kifoya. Ishimizning tezroq va ortiqcha tashvishlarsiz bitishiga emas, balki o‘z vaqti kelganida qonuniy asoslarda hal bo‘lishiga intilishimiz kerak. Otam bir umr poraxo‘rlikdan nafratlanib, unga qarshi kurashib yashadi. Ishida, shaxsiy hayotida shu tufayli paydo bo‘lgan muammolarni hech bir afsus yo og‘rinishsiz hal qilib, o‘z qarashlariga sodiq qoldi. Biz farzandlarga ham bu illatdan jirkanish tuyg‘usini o‘rgatdi. Ushbu kitob otam kabi poraxo‘rlikka qarshi kurashgan insonlarga ehtiromim belgisidir. Unda o‘zim hayotda guvohi bo‘lgan va boshimdan o‘tgan voqealar asosida tavsiyalar berishga harakat qilganman. Shuningdek, otam rahmatlining 1985 yilda yozgan etishga qaror qildim. Ular hamon o‘z dolzarbligini yo‘qotmagan.

Keyingi yillarda korrupsiyaga qarshi kurashishga davlatimiz tomonidan katta e’tibor qaratilgani bejiz yemas. Bu illatga barham berish qiyin ekanligi odamda havotir uyg‘otadi. Ushbu risolani yozishdan yana bir ko‘zlangan maqsad, davlat miqyosida olib borilayotgan korrupsiyaga qarshi kurashda oz bo‘lsada, o‘z hissamni qo‘shish niyatidir. Oldin ham aytganimdek, ijoddan ancha yiroq soha mutaxassisiman. Elektr aloqa muhandisligi bo‘yicha oliy ma’lumotim bor. Shu bois kitobda yo‘l qo‘yilgan xato va kamchiliklar uchun o‘quvchilardan oldindan uzr so‘rayman. Agar ushbu kitob sizga hayotda qandaydir naf keltirsa, kaminaning marhum ajdodlari ruhiga duoyi xayrda bo‘lasiz, degan umiddaman.