Абдулкарим Ҳасан: Жамият танасига тушган қурт

МУҚАДДИМА

Одам кўп нарсага кўникади дейдилар. Аммо бу кўникиш хислати иллатларга нисбатан ҳам одатга айланса, бундан ёмони йўқ. Чунки иллатни ўзи учун ҳаёт тарзига айлантирган одам, аввало ўзини ва ён-атрофдагиларни залолатга бошлаши тайин.

Ушбу рисолада бугунги кунда кўп бор тилга олинаётган порахўрликка инсон ўз табиатида кўникиб қолиши нималарга олиб келишини, бу иллат урчиган жойда тараққиёт бўлмаслиги, одамларнинг бундай жирканч иллатга бефарқ бўлиб боришларининг зиён-заҳмати, аслида, ҳеч кимни четлаб ўтмаслиги ҳақида сўз юритмоқчимиз.

Ушбу рисолани ёзишимга порахўрликнинг тобора кенг кулоч ёйиб бораётганидан ҳам кўра одамларда унга нисбатан кўникма ҳосил бўла бошлаётгани туртки бўлди. Бу порахўрликнинг ўзидан ҳам кўра қўрқинчлироқ, жирканчроқ иллатдир. Бефарқ одам «менга нима» дея бутун бошли жамият, миллатни таназзулга учратади, ҳалол ва ҳаром мезонларини аралаштириб юборади, ёмонлик ва ёмонларнинг гуллаб-яшнашига ҳисса қўшади.

Рисоладан мақсад — ҳар биримиз қалбимиздаги шу бефарқлик, миямиздаги мудроқликни қувиш, уйғоқ одамга айланиш. Бу бир қарашда кўрингани каби қийин эмас. Болаликдан айтиб келинган ҳалоллик тамойилларига, инсоф ва адолат мезонларига амал қилиш кифоя. Ишимизнинг тезроқ ва ортиқча ташвишларсиз битишига эмас, балки ўз вақти келганида қонуний асосларда ҳал бўлишига интилишимиз керак. Отам бир умр порахўрликдан нафратланиб, унга қарши курашиб яшади. Ишида, шахсий ҳаётида шу туфайли пайдо бўлган муаммоларни ҳеч бир афсус ё оғринишсиз ҳал қилиб, ўз қарашларига содиқ қолди. Биз фарзандларга ҳам бу иллатдан жирканиш туйғусини ўргатди. Ушбу китоб отам каби порахўрликка қарши курашган инсонларга эҳтиромим белгисидир. Унда ўзим ҳаётда гувоҳи бўлган ва бошимдан ўтган воқеалар асосида тавсиялар беришга ҳаракат қилганман. Шунингдек, отам раҳматлининг 1985 йилда ёзган этишга қарор қилдим. Улар ҳамон ўз долзарблигини йўқотмаган.

Кейинги йилларда коррупсияга қарши курашишга давлатимиз томонидан катта эътибор қаратилгани бежиз емас. Бу иллатга барҳам бериш қийин эканлиги одамда ҳавотир уйғотади. Ушбу рисолани ёзишдан яна бир кўзланган мақсад, давлат миқёсида олиб борилаётган коррупсияга қарши курашда оз бўлсада, ўз ҳиссамни қўшиш ниятидир. Олдин ҳам айтганимдек, ижоддан анча йироқ соҳа мутахассисиман. Электр алоқа муҳандислиги бўйича олий маълумотим бор. Шу боис китобда йўл қўйилган хато ва камчиликлар учун ўқувчилардан олдиндан узр сўрайман. Агар ушбу китоб сизга ҳаётда қандайдир наф келтирса, каминанинг марҳум аждодлари руҳига дуойи хайрда бўласиз, деган умиддаман.