Realme Watch 3 aqlli soati rasman taqdim etildi

Realme kompaniyasi o‘zining yangi – Watch 3 nomli smart-soati taqdimotini o‘tkazdi.

Watch 3 modelidagi asosiy yangilanishlardan biri ekran o‘lchami bo‘lib, u 1,8 dyuymgacha kattalashgan. Bunda ishlab chiqaruvchi old panellarni ixchamlashtirgan, shuning evaziga ekranning korpusga nisbati 67,5% ga yetgan (Watch 2 modelida bu ko‘rsatkich 50% ga teng edi). Biroq yangi soatda ekran aniqligi pasaygan. Watch 3 gadjetida u atigi 240 x 286 pikselga teng. Taqqoslash uchun, Watch 2 modelining ekrani aniqligi 320 x 320 pikselni tashkil etadi. Displey yorqinligi ham 600 nitdan 500 nitgacha tushirilgan.

Shunday bo‘lsa-da, Realme Watch 3 modelida Bluetooth-qo‘ng‘iroqlar imkoniyati paydo bo‘lgan, uning yordamida telefonni qo‘lga olmasdan turib ham qo‘ng‘iroqlashish mumkin. Ovoz sifati yaxshi bo‘lishini ta’minlash uchun, Realme bu soatini Smart PA dinamigi hamda ikki rejimli Bluetooth 5.3 chipi bilan, shuningdek, sun’iy ong asosidagi maxsus shovqin to‘suvchi algoritmlar bilan ta’minlagan.

Realme Watch 3 smart-soati 110 xildan ortiq sport rejimlarini qo‘llab-quvvatlaydi. Shuningdek, unda salomatlik monitoringi uchun ko‘plab funksiyalar mavjud. Bular qatorida SpO2, VO2 Max datchiklari, uyqu hamda stress monitoringlari va boshqalarni sanab o‘tish mumkin.

Soat korpusi polikarbonatdan ishlangan bo‘lib, metallashtirilgan qoplamaga ega. Oldingi avlodi kabi, Realme Watch 3 ham chang va suvdan IP68 standartiga ko‘ra himoyalangan, ammo ishlab chiqaruvchi uni taqib olib suzib bo‘lmasligini aytmoqda. Gadjet o‘lchamlari 45 x 37 x 11,5 millimetrni, vazni — 40 grammni tashkil etadi. Smart-soatning avtonom ishlashini 340 mA/soatlik tok sig‘imiga ega bo‘lgan akkumulyator ta’minlaydi.