Alvido iPhone Mini

Apple o‘zining iPhone 14 seriyasini chiqarishga tayyor, ammo bu turkumga iPhone 14 mini kirmaydi. Ushbu seriyada to‘rtta model bo‘ladi – iPhone 14 va iPhone 14 Max, ikkalasi ham 6,1 dyuymli displeylarga, iPhone 14 Pro va iPhone 14 Pro Max esa – 6,7 dyuymli displeylarga ega bo‘ladi. Aytish joizki, kelajakda Apple o‘zining “mini” seriyasini keyingi avlod iPhone SE sifatida sotishga qaror qilishi mumkin – bu faqatgina bizning taxminimiz. Quyida Apple’ni iPhone 14 mini’dan voz kechishga olib kelgan ehtimoliy sabablarni ko‘rib chiqamiz.

iPhone 12 mini va iPhone 13 mini bilan nima sodir bo‘ldi?

2020-yilda Apple 5,4 dyuymli iPhone 12 “mini” ko‘rinishidagi miniatyura flagmanini taqdim etdi, bu ko‘pchilikning e’tiborini tortdi. Ijtimoiy tarmoqlar va boshqa joylarda ijobiy sharhlar ko‘pligi barchani, shu jumladan Apple kompaniyasini ham katta sotuvlarni kutishga undadi. Biroq, savdo raqamlariga qaraganimizda, iPhone 12 mini unchalik yaxshi sotilmadi. Aslida, CIRP tahlilchisi hisobotiga ko‘ra, iPhone 12 mini sotuvga chiqarilgan dastlabki ikki oyda seriya umumiy sotuvining atigi 6 foizini tashkil qilgan. Shu bilan birga, standart iPhone 12 modeli 27%, iPhone 12 Pro va iPhone 12 Pro Max esa har biri 20%dan sotuvga erishdi. Ajablanarlisi shundaki, iPhone 12 mini’ning boshlang‘ich sotuv narxi 599 dollar bo‘lgan bir paytda bazaviy iPhone 12 smartfoni 699 dollardan boshlab sotilgan.

Shunga o‘xshash holat 2021-yil sentabr oyida, Apple o‘zining iPhone 13 seriyasini savdoga chiqarganda sodir bo‘ldi. Bunda batareyaning sig‘imi va displey yorqinligi oshirilganiga qaramay, iPhone 13 mini sotuvda unchalik yaxshi natija bermadi. CIRPning yana bir hisobotida aytilishicha, iPhone 13 mini 2-chorakdagi barcha iPhone’lar sotuvining atigi 3 foizini tashkil qilgan.

Bugungi kunda odamlar hali ham oldingi avlod flagmanlarini, jumladan iPhone 11, XR va SE’ni hozirgi avlod mini’dan afzal ko‘rishadi. Hatto CIRP hisobotida aytilishicha, iPhone XR, iPhone 11 va iPhone SE modellari iPhone 12 mini’dan yaxshiroq sotilgan. Shunday qilib, iPhone mini odamlarga Pro va Pro Max’ga nisbatan arzonroq narxda iPhone egasi bo‘lish imkonini bergan bo‘lsa-da, haqiqat shundaki, eski versiyalar ular uchun deyarli bir xil vazifani bajardi, hatto past narx va katta ekran bilan yaxshiroq ham edi.

Xo‘sh, endi Apple nima uchun iPhone 14 mini’ni to‘xtatmoqda?

Yuqorida aytib o‘tilgan mini-seriyalarning sotuvi pasayishining eng mantiqiy sabablaridan biri shundaki, Apple kompaniyasining flagman modellari yillar davomida brendga bog‘lanib qolish bilan bog‘liq va iste’molchilar ularni kattaroq hamda yaxshi displeyga ega bo‘lgan premium mahsulotlar sifatida ko‘rishadi. Shuning uchun iPhone 11, iPhone XR va boshqa iPhone modellari kattaroq displeylarga ega bo‘lganida, bu iPhone mini’ning premium mahsulot deb hisoblanishi haqidagi shov-shuvni yo‘q qildi.