O‘rxon Kamol: Dengizga otilgan ayol

Ayollarning mahzun qismatiga ko‘pincha ularga yaqin erkaklar sababchi bo‘lib qoladi. Baʼzan bilib, baʼzan bilmay...

Turk yozuvchisi O‘rxon Kamol qalamiga mansub – turmush o‘rtog‘ining qaltis qarori sabab umri xazon bo‘lgan bir ayol kechmishlari ifodalangan “Dengizga o‘zini tashlagan ona”(El kizi) romani voqealari kitobxonning qalbini larzaga soladi. Oddiy tilda, tushunarli bayonda ifoda etilgan ushbu roman bir nafasda o‘qiladi.

Mutolaaga kirishayotib, voqealar rivoji yosh va masʼuma kelin Nozan va eʼtiborli advokat Mazharbeyning baxtli turmushi asosida qurilar ekan, deya fikr qilganingiz on bu oilaning fojiali tarixi boshlanadi.

Eri tomonidan ko‘chaga haydalgan ayol balolarning turli ko‘yu ko‘chalarida sarson va sarosar kezadi.

Asar mutolaasi o‘quvchi uchun qayg‘uli, biroq muhim va kerakli ham...

Ona va bolaning juda-juda kech yuz bergan uchrashuvi, farzandi shaʼnini asrab qolish uchun imkoni va ilkida bori – jonini fido qilgan baxtiqaro ona qismati dilingizni o‘rtamay qo‘ymaydi.

Asarning oxirgi sahifasi ostidagi Tamom yezuviga ko‘zingiz tushar ekan, chuqur tin olasiz, bir ayolning toptalgan umri uchun alam va achinishga qorishiq hislarni tuyasiz, ko‘z yoshlaringiz bo‘g‘zingizni kuydiradi. Ayni damda tafakkur kilasiz...

Va qiz bolaga o‘z shaʼnini himoya qilish, haq-huquqlarini tanish, irodali bo‘lish darajasida taʼlim xamda tarbiya berish har bir davr uchun aktual masala bo‘lib qolajagiga amin bo‘lasiz.