Ming Bir Kecha. Arab ertaklari (8 jild)

"MING BIR KECHA" (arab. "Alif layla va layla") — o‘rta asr arab adabiyoti yodgorligi. Asosan, 15-asrda arab tilida tarkib topgan ertaklar to‘plami (qo‘lyozmalari 17—19-asrlarga mansub).

"Ming bir kecha" asarining mazmuni, voqealar tasnifi turli davrlar, Sharq xalqlari va mamlakatlarining tarixi bilan uzviy bog‘liq. Asar 300 dan ortiq qissa va hikoyalardan iborat bo‘lib, ularda Sharq xalqlarining urf-odatlari, orzu-umidlari, tarixi, sarguzashtlari o‘z ifodasini topgan; xudbinlik, ochko‘zlik, maishiy buzuqlik, johillik kabi illatlar qoralanib, poklik, rostgo‘ylik, donolik, kamtarlik, saxiylik singari fazilatlar ulug‘langan.

"Ming bir kecha" kompozitsiyasi "ertak ichida ertak" tarzida tuzilgan bo‘lib, undagi barcha ertak, hikoyat, masallar podshoh Shahriyor va vazirning oqila qizi Shahrizoda haqidagi ertak va hikoyatlar bilan o‘rab olingan. Malikaning xiyonatidan g‘azablangan Shaxriyor har kecha yotog‘iga yangi maʼshuqa keltirishni buyuradi va ertalab uni qatl ettiradi. Navbat Shaxrizodaga kelganda, qiz behuda qon to‘kilishining oldini olish maqsadida shohga hikoya aytib bera boshlaydi va hikoya eng qiziq joyiga kelganda, tong otib, hikoya aytishni to‘xtatadi. Hikoyaning davomiga qiziqib qolgan Shahriyor qatlni keyingi kunga qoldiradi. Shu tariqa ming bir kecha o‘tadi. Shahrizodaning aqlu zakovatidan lol qolgan Shahriyor unga uylanadi.

"Ming bir kecha" ning jahon kutubxonalarida 40 ga yaqin qo‘lyozmalari bor. Asarning birinchi, to‘la bo‘lmagan fransuzcha tarjimasi (A. Gallan) 1704—17 yillarda nashr etilgan. Uning matnidan boshqa ko‘plab Yevropa tillariga ham tarjima qilingan. 1911 yil Sidqiy Xondayliqiy forscha matnidan, bir yildan keyin (1912 yil) Ahror Mahdum arabchadan o‘zbekchaga qisqartirilgan holda tarjima qilgan. "Ming bir kecha" 1959— 63 yillarda arab tilidan o‘zbek tiliga to‘la tarjima etildi