M.M. Abdulxayeva: Kimyo

Mazkur qo'llanma kimyo fanidan akademik litseylar va kasb-hunar kollejlari uchun o'quv dasturi asosida yozilgan bo'lib, u umumiy o'rta ta'lim maktablarida olingan bilimlarni chuqurlashtirish va abituriyentlarni oliy o'quv yurtlariga kirish imtihonlariga tayyorlash uchun xizmat qiladi.

Qo'llanmada kimyoning asosiy tushunchalari va qonunlari, kimyoviy elementlar davriy jadvali, uning mohiyati, eritmalar, oksidlanish-qaytarilish jarayonlari, koordinatsion birikmalar to'g'risida, shuningdek, anorganik moddalar, ularning olinishi, xossalari, ishlatilishi, kimyoviy ishlab chiqarish texnologiyasi, respublikamizda kimyo sanoati erishgan yutuqlar, kimyoviy ishlab chiqarishning ekologiyaga ta'siri haqida ma'lumotlar bayon etilgan. Jumladan, kimyo sanoatida ishlab chiqarilishi yo'lga qo'yilgan ko'pchilik moddalarning olinish texnologiyasi, respublikamizda mavjud bo'lgan xomashyo turlari va manbalari to'g'risidagi ma'lumotlar, xomashyo va qazilma boyliklarni qayta ishlash va boyitish jarayonlari, ishlab chiqarish qonuniyatlari haqidagi keng ma'lumotlar berilgan.

Qo'llanmada har bir mavzuni yoritishda yangiliklar, O'zbekiston kimyo sanoatini rivojlantirish muammolari, o'zbek kimyogar olimlari erishgan yutuqlar to'g'risida ma'lumotlar berilgan. Yuqori molekulyar birikmalar, sun'iy va sintetik tolalar mavzularini yoritishda, fanning so'nggi yutuqlari va shu sohada o'zbek kimyogarlari olib borayotgan ilmiy izlanishlar haqidagi ma'lumotlar o'z aksini topgan. Shu bilan birga, o'z hayotini fanga bag'ishlagan o'zbek kimyogar olimlari haqida qisqacha ma'lumotlar berilgan.

Qo'llanmadan asosan akademik litseylar va kasb-hunar kollejlari o'quvchilari, oliy o'quv yurtlariga kirish uchun tayyorlanayotgan abituriyentlar, shuningdek, o'qituvchilar, kimyo faniga qiziquvchi barcha ilm o'rganuvchilar foydalanishlari va o'zlarini qiziqtirgan ma'lumotlarni olishlari mumkin.