G'iyosiddin Habibulloh, Farruh Abdulkarim: Ramazon sog'inchi

Albatta, hech bir kishiga sir emaski, mohi Ramazoni sharifni har bir mo‘min-musulmon kishi qalbida o‘zgacha intiqlik, sog‘inch va talpinish bilan kutadi. Bu oyda Alloh taolo ko‘plab rahmat va barakotlarini nozil qiladi. Barcha insonlar bu oyda har doimgidan o‘zgacha, ajib bir kayfiyatda, ruhiyatda bo‘ladilar.

Robbimiz Alloh subhonahu va taoloning fazlu marhamati bilan so‘nggi yillarda yurtimizda diniy-maʼrifiy sohani rivojlantirishga yanada kengroq yo‘l ochilgani, qolaversa, ixlosli xalqimizning muqaddas dinimiz ahkomlarini o‘rganishga ko‘proq intilishi barobarida, asta-sekinlik bilan qariyb unutilayozgan diniy qadriyatlarimiz yana qadr topa boshladi.

Yurtdoshlarimiz dinimizning eng muhim ruknlaridan bo‘lgan namoznigina emas, endilikda zakot, ro‘za va haj masalalarini ham vatanimizdagi ilm ahllari tarafidan taqdim etilayotgan asarlar orqali o‘qib-o‘rganayotirlar.

Shu bilan bir qatorda qilinayotgan ibodatlarning ruhiyatimizga taʼsiri alohida ahamiyatga ega. Chunki dinimiz hukmlarini ixlos va bardavomlik ila bajarish yuksak maʼnaviyat va barkamol xulq egasi bo‘lishda benihoya ahamiyatlidir.

Muborak Ramazon oyining har bir mo‘min-musulmon shaxs qalbida alohida va o‘zgacha o‘rni, hurmati bor. Bu oy bizni ruhan va qalban birlashtiradigan rahmat va mag‘firat oyidir.

Ro‘zaning sharʼiy va tibbiy hikmatlari haqida ko‘p bora gapirilgan. Bu haqida maʼlumotlar bayon etilgan alohida kitoblar ham bor.

Ammo hukmingizga havola etilayotgan mazkur moʻjaz risolada asosiy eʼtibor bular haqida emas. Risola butunlay boshqa yo‘nalishda yozilgan. Unda mualliflar aynan Ramazon oyi ichida turib, qalblari va ruhiyatlarini bu muborak oyning shukuhi egallab turganida xotirlaridan o‘tgan qalb kechinmalarini bayon etganlar.

Shu bilan birga, risolada Ramazoni sharif boshqa insonlar bilan bo‘lgan munosabatlarimizni tiklash va mustahkamlashimiz uchun bebaho g‘animat palla ekani, ko‘pchiligimiz g‘aflatda qolayotgan eng muhim amallar haqida maʼlumot beriladi.

Bundan tashqari, har bir mo‘min-musulmon uchun yanada foydali bo‘lishi maqsadida, kitobcha so‘ngida Ramazon oyi va ro‘zaga tegishli eng muhim masalalar savol-javob ko‘rinishida taqdim etildi. Bir so‘z bilan aytganda, risolani Ramazon ruhiyati, axloqi va amallarini yorituvchi kichik qo‘llanma, esdalik bo‘lishi niyat qilindi.