Farida Afro'z 4 jild

F.Afro‘z so‘zning nozik latofatini chuqur anglaydi. Uning har bir kitobining nomi ham buni tasdiqlaydi. Shoiraning shu kunlarda nashrdan chiqqan to‘rt jilddan iborat asarlar to‘plami bu fikrga yana bir isbotdir. To‘plam avvalo nomi, so‘ng o‘ziga xos dizayni va ichki bezaklari bilan har qanday o‘quvchini befarq qoldirmaydi, hayratlar olamiga tortib ketadi. Shoira mazkur to‘rt yirik kitobning har biriga alohida: «Meni kuting...», «O‘zimni sog‘inib...», «O‘limi yo‘q hayot...» va «Pardani ochaylik...» deya nom qo‘yadi.

Shoir borki, she’riyatga o‘z ta’rifi bor. Ushbu kitob muqaddimasida F.Afro‘z ham avvalo she’r va she’riyat, ijod va ijodkor olami tushunchalarini ta’riflashga urinadi.

She’riyat – baland tog‘ cho‘qqisidagi

shifobaxsh buloqqa o‘xshaydi.

Unga faqat o‘zing chiqib borasan.

Buloqdan yuz-qo‘lingni yuvib,

bir qultum ichganingdan keyin esa

ortga sira ham ketging kelmay qoladi.

Shoira nazarida, she’riyat olami – asrlarni tebratguvchi beshik. Unda ulg‘aygan qalb kishilari davrning tili, millatning yuzi, ko‘ngillarning tarjimoni bo‘lib keladilar.

Toki bunda ayriliqlar bor,

Nadomat bor, g‘amlar, armonlar,

Sen ham borsan, sen borsan ShE’RIM!