Dafna dyu Morye: Rebekka

Dengiz to‘lqinlari qirg‘oqqa urilib mavjlanayotgan go‘zal va so‘lim tabiat, yomg‘irli hamda bahavo manzil. Ushbu go‘shada joylashgan qadimiy va go‘zal Manderley qo‘rg‘oni...

Asar mutolaasiga kirishar ekansiz, nafaqat so‘lim tabiat vasfiga qalbingiz oshufta bo‘ladi, balki ana shu maʼvoning huzurbaxsh iqlimini, farahbaxsh iforini his qilasiz. Mazkur maftunkor manzilda kechadigan sirli voqealar jarayoni esa qismdan qismga hayrat va qiziqishingizni orttira boradi. Bu taʼrifimiz hissiyotlar va tuyg‘ular tug‘yoniga sabab bo‘luvchi "Rebekka" asari xususida.

"Rebekka" - Dafna dyu Moryening 1938 yilda yozilgan romani. Psixologik triller janridagi asarda yosh qiz badavlat beva erkakka turmushga chiqadi va eri hamda oilasidagilar kabi o‘zini ham o‘lgan birinchi xotinning xotirasi taʼqib qilishini bilib oladi.

Hammaning xotirasida nihoyatda samimiy va juda go‘zal ayol sifatida muhrlangan Rebekka aslida kim edi? U bilan bog‘liq qanday sirlar bo‘lgan? Ularning oshkor bo‘lishi asar qahramonlari hayotiga qanday taʼsir ko‘rsatadi? Demak, bu kabi savollarning barchasiga qizg‘in mutolaa jarayonida javob topasiz.

Eslatib o‘tamiz: mazkur bestseller asar ko‘p marotaba sahna va ekranga moslashtirilgan. Ammo bilishingizni istardikki, hech qaysi sahna yoki kino asari ushbu romanda ifoda etilgan atmosferani taqdim eta olmaydi!

Ingliz tilidan Gulnora Rahmon tarjimasi