Asqad Muxtor: Tanlangan asarlar (2 ta kitob)

O‘zbekiston xalq yozuvchisi Asqad Muxtor romanlari, talay qissa, hikoya va dramalari, falsafiy lirikasi, jahon adabiyoti namunalaridan badiiy yuksak tarjimalari bilan hamda nazariyotchi sifatida XX asr o‘zbek adabiyotiga katta hissa qo‘shgan so‘z sanʼatkoridir.

O‘zbekiston xalq yozuvchi Asqad Muxtorning tanlangan asarlari birinchi jildiga adibning “Chinor” va «Buxoroning jinko‘chalari» kabi nasriy asarlari kiritildi. Ushbu asarlarda Asqad Muxtor xalqimizning bosib o‘tgan tarixiy o‘tmishini, uning aniq lavhalarini tasvirlaydi.

“Chinor” asari bir o‘zbek oilasi haqida. Bu oila katta, qadimiy, madaniy, mehnatkash va shu maʼnoda “tagli-zotli”. Uning har bir aʼzosi xalq hayotida maʼlum bir masʼuliyatli yukni o‘z zimmasiga olgan. Jonajon tuproqqa chuqur tomir yoygan, baquvvat va qadimiy Chinor mangulik ramzi, xalqimiz ramzidir.

«Buxoroning jinko‘chalari» - mashhur davlat arbobi Fayzulla Xo‘jayevning o‘smirlik yillari haqida. Binobarin, undagi voqealar XX asrning boshida kechadi. Lekin avtorni ko‘proq hozirgi zamon muammolariga hamohang masalalar qiziqtiradi. Bu muammolar asosan yoshlar tarbiyasiga aloqador: ijtimoiy eʼtiqod, hayotda murod-niyatlilik, katta maqsadlar yo‘lida shaxsiy manfaatlardan kecha bilish, shaxs maʼnaviyati, el-yurt mehri, uning tabiiy zamini va yetilish shartlari kabi masalalardir.

Tanlangan asarlarining ikkinchi jildiga sheʼrlar, hikoyalar, maqolalar, tundaliklar qamrab olingan bo‘lib, adibning ko‘p qirrali ijodkor bo‘lganini ko‘rsatadi. Kitobning oxirida Asqad Muxtor haqida uning do‘stlari va hamkasblarining xotiralari o‘rin olgan. Samimiyat va mehr bilan bitilgan bu esdaliklarda adibning insoniy va ijodiy qiyofasi yorqin gavdalanadi.