Abdulkarim Hasan: Saodat Kaliti

Ushbu risola tobora zaiflashib ketayotgan qondoshlik munosabatlari, jigarlar orasidagi oqibati ayanchli tugayotgan dunyo talashish, janjalu nizolar borasidagi kuzatishlarim mahsulidir.

Ilgari uka yo singilning o‘zidan katta jigarlariga qo‘pol va ters muomala qilishi kam uchrardi. Hozir suv oqishi kabi odatiy holga aylanib qoldi. Kattalarning ham ulug‘lik shohsupasidan pastga tushib ularga javob qaytarishi hech kimni ajablantirmay qo‘ydi. Kishi ko‘zini yog‘ bosib, quloqlari to‘g‘ri so‘zlarni eshitmay, ko‘zlari haq yo‘lni ko‘rmay qolishi ayanchlidir. Ular oddiy haqiqatni ham anglashga ojiz bo‘ladi. Bunday holatning jigarlar o‘rtasida yuz berishi esa, ayniqsa, ikki karra yoqimsizdir.

Oxirgi vaqtlarda ijtimoiy tarmoqlarda o‘z ota-onasiga qo‘l ko‘targan, uydan haydab chiqargan va boshqa shu kabi zulm o‘tkazayotgan farzandlar, yoki aksincha, o‘z farzandlariga zug‘um va nohaqlik qilayotgan ota-onalar mavzusi, afsuski, trendga aylandi. Oldingilari kabi bu risolada ham mulohaza va tavsiyalarim shaxsiy kuzatuvlarimga asoslandi.

Oilamiz katta va serfarzand edi. Ammo berilgan tarbiya, buvimiz va ota-onamiz shakllantirgan muhit tufayli, shukurki, bizning oramizda yuqoridagi noxush holatlar bo‘lmagan. Qo‘lingizdagi risolada jigarlar bilan maslahatlashish, fikr bildirish va ular qabul qilgan qarorlarni hurmat qilishga oid qarashlar ham bayon etilgan. Shu kichik risola vositasida oila aʼzolari, qon-qarindoshlar orasidagi munosabatlarni yana-da mustahkamlash, uzilgan rishtalarni bog‘lashga, o‘zaro munosabatlarda tez-tez uchraydigan muammolarni izohlash va ularga yechim topishga, shaxsiy tajribamdan kelib chiqib tavsiyalar berishga harakat qildim.

Ushbu risola ikki qismdan iborat bo‘lib, birinchi qismda asosiy eʼtibor bola tarbiyasi va jigarlararo munosabatlarga qaratilgan. Bu masalalarning ko‘pchilik eʼtiboridan chetda qolib ketadigan nozik jihatlarini ham keltirib o‘tishga harakat qildim. Ikkinchi qismda bizlarni ulg‘aytirgan ota-ona va bobo-buvilarga munosabat, ular xastalanib qolganda qilinadigan parvarishning nozik tomonlarini yoritib berishni maqsad qildim.

Bandaning ishida xato bo‘lishi muqarrar. Umidim shuki, risolani yozishda yo‘l qo‘yilgan barcha kamchilik va xatolar, o‘quvchiga to‘g‘ri va aniq yetkazib bera olinmagan fikrlar uchun kaminani maʼzur tutasiz. Agar mazkur asar mutolaasidan sizga ozgina manfaat yetgan bo‘lsa, evaziga o‘tgan yaqinlarimiz, xususan, bizni tarbiyalab ulg‘aytirgan buvim va otam, hamisha to‘g‘ri yo‘l va xayrli ishlarga boshlagan ukajonim haqiga bir hovuch duo so‘rayman.