Abdulhamid Zayriyev: Osonlashtirilgan Islom aqidasi risolasi

Aqida Islomning ilk davridanoq dolzarblik kasb etib kelgan mavzulardandir. Qurʼonning Makka davrida tushgan ilk sura va oyatlarining qariyb barchasi aqidaviy mazmunga ega. Payg‘ambarlikning ilk davrlari ham, asosan, odamlarning aqidasini to‘g‘rilash va tuzatish bilan o‘tgan. Bu holat aqidalar majmui insoniyatning birlamchi bilib olishi va qalbida doimiy saqlashi kerak bo‘lgan eng ustuvor g‘oyasi bo‘lishi kerakligini anglatadi. Shuning uchun ham buyuk faqih Imomi Aʼzam Abu Hanifa ibn Sobit (80-150/699-767) rahmatullohi alayh aqida ilmini «Fiqhul akbar» («Eng katta fiqh» yoki «Ulug‘ fiqh») deb ataganlar. Fiqh so‘zining maʼnosi haqida esa u zot: «Fiqh — insonning o‘ziga foydali va zararli narsalarni bilmog‘idir», deganlar. Demak, har bir inson va har qanday jamiyat o‘ziga foydali va zararli g‘oya va mafkuralar, fikr va dunyoqarashlarni bilishi va o‘zlashtirishi aqida ilmining mavzusi hisoblanar ekan.

Hurmatli o‘quvchi, Islom insoniyatga hamma zamonlar va makonlarda, barcha xalqlarga manfaat keltirishi uchun nozil qilingan yagona haq dindir. Islom bu dunyoda tinchlik va xotirjamlikka, oxiratda esa abadiy saodatga erishish uchun inson hayot tarzini tartibga soladi. Ushbu kitobchada keng omma tomonidan yengil qabul qilinishi uchun Islom taʼlimotiga tegishli baʼzi muhim va asosiy jihatlari oson savol-javob tarzida bayon etildi. Bu javoblarning to‘g‘riligidan o‘quvchi ko‘nikish hosil qilishi uchun Qurʼon va sahih hadislardan dalillar ham keltirilgan.