Abdig‘affor Gadayev: Ichki kasalliklar

So‘nggi yillarda ichki kasalliklarning etiologiyasi, patogenezini o‘rganish, tashxislash va davolashni mukammallashtirishda sezilarli ijobiy natijalarga erishildi. Bu, avvalo, amaliyotga yangi zamonaviy laborator-asbobiy tekshirish usullarining joriy etilishi va yuqori samarali dorilarning yaratilishi bilan bog‘liq. Lekin, shunga qaramasdan, butun dunyoda, jumladan, O‘zbekistonda ham aholi orasida keng tarqalgan. yuqumli bo‘lmagan kasalliklarning ko‘payishi kuzatilmoqda. Uning qator obyektiv va subyektiv sabablari mavjud bo‘lib, ulardan biri amaliyotda ishlayotgan shifokorlarning yuqorida qayd etilgan zamonaviy usullar bilan yetarli darajada tanish emasliklari va so‘nggi yillarda talabalar uchun lotin alifbosida darsliklar nashr etilmaganligidir. Shularni eʼtiborga olib, lotin alifbosida qayta nashr etilayotgan mazkur darslik tibbiyotning so‘nggi yutuqlariga tayanilgan holda tibbiyot institutlarining davolash va tibbiy pedagogika. fakultetlari IV-VI kurs talabalari o‘quv rejasiga mos ravishda tayyorlangan. Unda aholi orasida keng tarqalgan ichki kasalliklar batafsil yoritilgan. Darslikdan nafaqat talabalar, balki amaliyotda ishlayotgan shifokorlar ham foydalanishlari mumkin.

COVID-19 infeksiyasi va u bilan bog‘liq ichki aʼzolarning zararlanishi butun dunyoda, shu jumladan, respublikamizda ham keng tarqalganini inobatga olib, ushbu nashrda unga bag‘ishlangan yangi bob qo‘shildi.