2023-yilda Apple bizga nimalarni tayyorlab qo‘ygan

Chiqqaniga ko‘p bo‘lmagan iPhone 14 hali o‘zini ko‘rsatishga ulgurmasidan ijtimoiy tarmoqlarda Apple’ning yangi gadjetlari haqida mish-mishlar tarqala boshladi. Ushbu maqolamizda kompaniya kelasi yilda o‘z mijozlariga nimalarni taqdim etishi haqida aytib o‘tamiz.

MacBook Pro 14” va 16”

Bloomberg muxbiri Mark Gurmanning so‘zlariga ko‘ra, kompaniya o‘zining yuqori darajadagi noutbuklarining yangilangan versiyalarini tayyorlamoqda. Mish-mishlarga ishonadigan bo‘lsak, noutbuklarda faqatgina chip yangilanadi. Boshqa o‘zgarish yo‘q.

KATTA MacBook Air

Ushbu noutbukni oldingi avlodi bilan solishtiradigan bo‘lsak, iPhone 14 hamda iPhone 14 Plus’ga o‘xshaydi, ya’ni yangi avlod kattaroq ekranga ega bo‘ladi (katta ekranlar har doim trendda). 2022-yilgi MacBook Air 13,6 dyuymlik bo‘lsa, kelasi yili bizni 15,5 dyuymlik noutbuklar kutmoqda.

AirPods Max 2

AirPods Max quloqchinlarining yangilangan versiyasi 2023-yilning sentabrida chiqishi hamda USB-C portiga ega bo‘lishi kutilmoqda. Taxminlarga ko‘ra, gadjet yaxshilangan ovozga ega va namlikdan himoyalangan bo‘ladi.

iOS 17

Yangi versiya 2023-yil iyun oyida chiqariladi. Qoidaga ko‘ra, Apple birinchi navbatda katta o‘zgarishlarga ega yangi versiyani taqdim etadi, so‘ngra tizimni yaxshilagan holda minimal innovatsiyalar bilan yangi talqinini chiqaradi. iOS 16 shunday katta o‘zgarishlarga ega bo‘lganini hisobga olsak, iOS 17 da inqilobiy o‘zgarishlar bo‘lmaydi.

Pro Display XDR

Displeyning birinchi versiyasi 2019-yilda chiqarilgan. Mark Gurmanning aytishicha, 2023-yilda biz displeyning yangi versiyasini ko‘rishimiz mumkin. Displey ikkita o‘zgarish: yangi chip va 120 Gts ekran yangilanish tezligini qo‘llab-quvvatlaydi.

iMac

Monoblok kelasi yilning oxirlariga chiqishi kutilmoqda. U haqida faqatgina bitta ma’lumotga egamiz: monoblok M3 chipiga ega birinchi qurilma bo‘ladi.

Apple Watch 9 va Apple Watch Ultra 2

Keyingi Apple Watch uchun qanday yangilanishlar bo‘lishini aytishga hali erta. 9-seriyaning rasmiy taqdimotiga hali bir yil (undan ham kam) vaqt bor. Ammo, taxmin qiladigan bo‘lsak, yangi versiya kattaroq ekran, kuchliroq batareya va “soft”ga ega bo‘lishi mumkin. Apple ushbu gadjetlarini kuz faslida taqdim etadi.

iPhone 14

Ha, 15 emas, aynan 14. 2023-yilning bahorida Apple yana o‘sha smartfonini taqdim etadi, faqat yangi rangda. Kompaniya ushbu ishni birinchi bora qilayotgani yo‘q. Oldin iPhone 12 va iPhone 13 smartfonlarida ham shunday vaziyat kuzatilgan edi. Kompaniya bu ishni auditoriyaning qiziqishini oshirish uchun qilmoqda. Yangi iPhone qanday rangda bo‘lishi hozircha aniq emas.

iPhone 15

Ushbu smartfon haqidagi mish-mishlar juda ko‘p. Tahlilchilarning fikricha, kelajakdagi iPhone smartfonlari USB-C porti, yangilangan korpus dizayni va sensorli yon tugmalarga ega bo‘ladi. Shuningdek, Ultra versiyasi haqida ham taxminlar mavjud. Ehtimol, u Pro Max versiyalarining o‘rniga kelar.

Hozircha bularning barchasi taxminlar. Albatta, taqdimot yaqinlashgani sari ma’lumotlar yangilanadi, chunki Apple istalgan vaqtda o‘z fikrini o‘zgartirib, kutilgan mahsulot o‘rniga boshqasini taqdim etishi mumkin. Bizni kuzatishda davom eting, biz esa foydali ma'lumotlarni baham ko'rishda davom etamiz!