Qay biri zo‘r: Apple Watch 7 yoki Samsung Galaxy Watch 4?

Smart-soat olmoqchisiz, ammo qay biri – Apple Watch 7 yoki Samsung Galaxy Watch 4 yaxshiroq ekani borasida ikkilanyapsizmi? Har ikkala model ham qiziq va ko‘pfunksiyali, ammo xarid oldidan bilib qo‘yish kerak bo‘lgan ayrim nozik jihatlar mavjud. Bugun eng yangi Apple Watch hamda Samsung Galaxy Watch modellarini qiyoslaymiz. Bulardan qay biri yaxshi ekaniga, ularning farqlari va umumiyliklari nimalarda ekaniga aniqlik kiritamiz.

Apple Watch 7 va Samsung Galaxy Watch 4: ekranlar xususiyatlari

Amerikalik kompaniyaning 7-avlod smartvotchi Retina turidagi OLED-displeyga ega. U oltinchi avlod vakilidan 20% ga kattaroq, 70% ga yorqinroq ham. Displey atrofidagi romning ixchamlashuvi tufayli unga endi 50% ga ko‘proq matn sig‘adi. Shuningdek, Apple Watch 7 g‘ayrioddiy bezatuv mavzulariga hamda kishiga moslashuvchi siferblatga ham ega. Doimiy faol ekran funksiyasi mavjud – unda vaqt, o‘tkazib yuborilgan bildirishnomalar hamda sana hamisha aks etib turadi. Soatning ko‘plab foydalanuvchilari bu funksiyaning qulay ekanligini e’tirof etishmoqda. Apple Watch 7 ikki xil o‘lchamda taqdim etilgan: 41 mm va 45 mm.

Samsung Galaxy Watch 4 ham foydalanuvchiga ko‘plab qiziqarli siferblatlar taklif etadi – betakror fonlar, shriftlar va ranglarga ega bo‘lgan, analogli va raqamli variantlar. Hatto maxsus ilova orqali o‘z kunlik qiyofangizga mos interfeyslar tanlashingiz ham mumkin. Galaxy soati ham ikki xil o‘lchamda taqdim qilingan – 40 va 44 mm.

Suvdan himoya

Apple soati bilan ham, Samsung’niki bilan ham basseynda mashq qilaversa bo‘ladi – ular suvga sho‘ng‘ishga bardosh beradi va faollik ko‘rsatkichlarini suv tubida ham muammosiz kuzatib bora oladi. Apple ma’lum qilishicha, Apple Watch Series 7 — “olmali” korporatsiyaning eng mustahkam soatidir. U kuchaytirilgan old oynaga ega, yana oldingidek IP6X toifasida changdan va WR50 standartiga ko‘ra suvdan himoyalangan. Bu soat bilan 50 metrgacha chuqurlikdagi suv ostida soatlab qolish mumkin.

Galaxy Watch ham suvdan muhofaza qilingan – u 5 atmosfera bosimigacha (ya’ni – buyam 50 metrgacha) suv ostiga sho‘ng‘ishga bardoshli. Bu borada qo‘l soatlari uchun joriy etilgan ISO 22810:2010 xalqaro standartga muvofiq keladi.

Apple Watch 7 va Galaxy Watch 4: unumdorlik va avtonomlik

Soatlarning ish unumdorligini taqqoslashdan aytarli foyda yo‘q, chunki har ikkala model ham qudratli va eng so‘nggi avlod chiplarda ishlaydi hamda har qanday vazifani uddalaydi:

• Samsung soati — Exynos SoC protsessori;
• Apple soati — S6 protsessori.

Har ikkala protsessor ham zamonaviy, bozordagi eng yaxshi samaradorlik va quvvat tejamkorligini namoyish etuvchi chiplardir.

Avtonomlik masalasiga kelganda, ta’kidlash kerakki, Samsung smart-soati bu borada katta ustunlikka ega – Galaxy Watch 4 bitta quvvat bilan 40 soatgacha ishlay oladi. Apple Watch 7 modelida mazkur ko‘rsatkich ancha past – 18 soat. Biroq amerikaliklarning yangi smartvotchi oltinchi avlod vakilidan ko‘ra tezroq quvvatlanadi; bunga esa USB-A o‘rniga Type-C kabeli qo‘llangani sababchidir. Soatning 8 daqiqa davomida oladigan quvvati 8 soatlik uyqu nazoratiga yetadi; uning akkumulyatori 0 dan boshlab 80% gacha 45 daqiqada zaryadlanadi.

Unumdorlik borasida har ikkala smart-soat teng bo‘lsa, avtonomlik sinovida Samsung yaqqol g‘olibdir.

Salomatlik monitoringi

Galaxy Watch 4 funksional imkoniyatlari Apple Watch’nikidan kam emas. Keyingi paytlarda Samsung inson salomatligi va faolligini nazorat qiluvchi juda yaxshi gadjetlar tayyorlamoqda. Apple soatida bir nechta turli datchiklar mavjud bo‘lsa, Samsung soatida bittaginasi bor. Bu datchik BioActive 3 in 1 deb nomlangan va uchta ko‘rsatkichni nazorat qila oladi:

• puls (optik datchik orqali);
• EKG;
• bioimpedans tahlili.

Shuningdek, bu datchik foydalanuvchiga arterial qon bosimi darajasini kuzatib borish, atriyal fibrilatsiyani aniqlash, qon tarkibini va undagi kislorod darajasini kuzatib borish imkonini beradi. Mutlaqo yangi funksiya – tananing bioimpedans tahlili tufayli foydalanuvchi o‘z salomatligining holati haqidagi batafsil ma’lumotni oladi; unga suyak muskullari, metabolizm, suv va yog‘ miqdori kabilar to‘g‘risidagi axborotlar kiradi. Apple Watch 7 smartvotchida esa bunday funksiya yo‘q.

Samsung soati arterial qon bosimi ko‘rsatkichlarini maksimal aniqlikda o‘lchaydi. Buning uchun gadjetni har to‘rt haftada bir marta kalibrovka qilib turish kerak.

Samsung soatini xarid qilishdan avval inobatga olish kerak bo‘ladigan bitta nozik jihat bor. Unda monitoring to‘laqonli ishlashi uchun Samsung Health Monitor ilovasi kerak bo‘ladi, u esa faqat Galaxy turkumi telefonlariga tushadi. Shuning uchun, agar iPhone, Xiaomi yoki Huawei smartfonini ishlatadigan bo‘lsangiz, bu ilovani ularga o‘rnata olmaysiz.

Samsung ta’kidlashicha, mazkur ilova gipertoniya va aritmiya tashxislarini qo‘ymaydi, yurak xurujini aniqlamaydi, balki faqat yurak faolligi ko‘rsatkichlarini va bu borada tavsiya etiluvchi me’yorni taqdim etadi. Shuningdek, shifokorga borishni tavsiya etishi mumkin. Bu ilova shifokor huzuridagi an’anaviy tashxis va muolaja o‘rnini bosa olmaydi.

Galaxy Watch 4 modelida uyqu monitoringi funksiyasi, do‘stlar bilan birgalikdagi sport mashg‘ulotlari hamda 90 turdan ortiq mashqlar qo‘llovi mavjud.

Apple Watch 7 devaysida esa, yuqorida ham ta’kidlaganimizdek, bitta emas, balki bir nechta datchik bor:

• qondagi kislorod darajasi datchigi;
• yurak faolligining elektrik datchigi;
• yurak maromining optik datchigi.

Apple soati ham xuddi Samsung mahsuloti kabi imkoniyatlarga ega: pulsni, kislorod darajasini monitoring qilish, uyqu sifatini kuzatib borish. Bulardan tashqari, amerikalik korporatsiya smartvotchida kompas hamda joylashuvni aniqlash uchun GPS/GLONASS/BeiDou modullari ham mavjud.

Apple Watch 7’ning o‘ziga xosliklari nimada

1. Ochiq havodagi velomashg‘ulotlar qo‘llovi yaxshilangan. Agar svetoforda yoki shunchaki dam olish uchun to‘xtab qolsangiz, soatning o‘zi mashg‘ulotni pauzaga qo‘yib turadi.
2. Fitness Plus ilovasida pilates hamda Share Play orqali do‘stlar bilan birga mashqlar qilish imkoni paydo bo‘lgan.
3. Kaloriyalarni hisoblash algoritmi yaxshilangan.
4. Apple Fitness+ ilovasida audio va video jo‘rligidagi meditatsiyalar qo‘shilgan.
5. «Qoyaga ko‘tarilish», «Skvosh», «Snoubording», «Tayszitsyuan» (Xitoy jang san’ati) mashg‘ulotlarini qo‘llab-quvvatlaydi.
6. Agar avtomobilingiz yoki uyingiz raqamli kalit funksiyasini qo‘llab-quvvatlasa, eshiklarni bir lahzada ochish uchun uni Wallet’ga qo‘shish mumkin.

Har ikkala gadjetda ham funksionallik yuksak darajada, ular barcha trendlar va innovatsiyalarni hisobga olib yaratilgan. Ammo, agar Galaxy Watch 4 xarid qilishni istasangiz, kompaniya ilovasini o‘rnatish va soatning barcha imkoniyatlaridan foydalanish uchun telefoningiz albatta Samsung Galaxy bo‘lishi shart. Apple Watch ham iPhone bilan hamkorlikda o‘zini yaxshiroq va professionalroq namoyon etadi. Biroq, agar smart-soatning superfunksiyalari sizga unchalik kerak bo‘lmasa, bu soatni boshqa smartfonlar bilan ham ishlatsa bo‘ladi.