Apple allaqachon yangi Apple Watch Ultra soatining ayrim modifikatsiyalarini o‘z vaqtida yetkazib berolmayapti

Eng zo‘r Apple Watch’larning do‘konlarga chiqishi va xaridorlarga yetkazib berilishi 23-sentabrga belgilangan. Ammo chorshanba kunining yakuni holatiga ko‘ra, uning ba’zi konfiguratsiyalari allaqachon yetkazib berishda uzoq muddatli kechikishlarga duchor bo‘lmoqda.

Apple’ning AQShdagi internet-do‘konida o‘tkazilgan tezkor tanlab tekshirishning ko‘rsatishicha, Midnight Ocean Band tasmachali va yashil Alpine Loop ilmoqli modellar uchun chorshanba kuni kechqurun berilgan buyurtmalar xaridorlarga 3–4 hafta mobaynida yetkazib berilishi mumkin. Trail ilmoqli modellarning bir nechta rang variantlari hatto yanada kech, ya’ni 6–7 hafta davomida eltib beriladi. Shunday bo‘lsa-da, soatning kamida olti xil varianti, oldingidek, sotuv boshlangan 23-sentabr kunining o‘zidayoq egalariga topshiriladi.

«Faoliyatning eng ekstremal turlari»dan ilhomlangan Apple Watch Ultra soatlari titan korpusli mustahkam tuzilmasi bilan ajralib turadi. Korpus diametri 49 mm, displeyi kattalashtirilgan va sapfir shishasidan ishlangan yassi qoplamaga ega. Tasmachasi ochiq havoda qo‘llashga moslab ishlab chiqilgan, soat suv tubiga 100 metrgacha tushirilganida ham korpus ichiga suv kirmaydi. Korpusning chap tomonida yorqin zarg‘aldoq rangli, sozlanuvchi «Harakat» tugmachasi, o‘ng qirrasida esa raqamli g‘ildirakchasi va yon tugmachasi masjud.

Yangi informatsion Wayfinder siferblati katta displeyning afzalliklaridan foydalanadi, ular orasida sakkiztagacha kengaytma qo‘llovi hamda kompas ham mavjud.

Reklamasida aytilishicha, Apple Watch Ultra oddiy rejimda bitta quvvat bilan 36 soatgacha ishlay oladi. Kelajakda watchOS 9 yangilanishi bilan quvvat tejashning yangi sozlamalari keladi, unda GPS hamda yurak maromini o‘lchash chastotalarini pasaytirish mumkin bo‘ladi, o‘shanda batareyaning bitta quvvatda ishlash muddati 60 soatgacha oshadi.