Apple yangi M2 chipida bazaviy iPad va iPad Pro taqdim etdi

Apple kompaniyasi iPad hamda iPad Pro planshetlarining yangi avlodini, shuningdek, yangilangan Apple TV pristavkasini namoyish qildi.

Apple TV

Yangilangan pristavkaga yanada yuqori unumdorlik uchun A15 Bionic chipi o‘rnatilgan. Yangi Apple TV modeli Dolby Vision va HDR10+ texnologiyalarini, shuningdek Dolby Digital 5.1 hamda 7.1 formatlaridagi hajmdor ovozni qo‘llab-quvvatlaydi. Yana bir yangi jihati: pult endi Lightning emas, balki USB-C porti orqali quvvat oladi.

Ushbu pristavkaning AQShdagi narxlari quyidagicha: Wi-Fi hamda 64 GB xotirali Apple TV versiyasi – $130 (1 432 000 so‘m); bir gigabitlik Ethernet tirqishi hamda 128 GB xotiraga ega modeli – $150 (1 654 000 so‘m).

iPad Pro

Yangilangan – oltinchi avlod iPad Pro sotuvga ikki xil o‘lchamda chiqadi: diagonaliga 11 dyuymlik hamda 12,9 dyuymlik IPS-ekranli. Ularning displeyi miniLED texnologiyasiga ko‘ra ishlangan va ProMotion – kadr yangilanishining yuksak chastotasiga ega.

Planshetlar Apple M2 protsessori bazasida yaratilgan, Apple bergan ma’lumotlarga ko‘ra, u markaziy hisoblash chipi bo‘yicha oldingi avlod – M1 protsessoridan 15% ga tezkor, grafik chipining ishi esa 35% ga tezlashgan. Undagi Neural Engine neyrochipi soniyasiga bajara oladigan operatsiyalar 40% ga oshgan. Xotiraning o‘tkazuvchanlik qobiliyati 100 GB/soniyaga yetgan, bu esa M1 chipining ko‘rsatkichidan 50% ga yuqori.

Yangi iPad Pro modellarini 8 yoki 16 GBlik tezkor hamda 128, 256, 512 GBlik, 1 yoki 2 TBlik ichki xotirali variantlarda olish mumkin. Planshetlar uchta kamerali: 12 MPlik asosiy, 10 MPlik keng burchakli hamda 12 MPlik old modul.

Ikkinchi avlod Apple Pencil endi displey yuzasida 12 millimetrgacha balandlikda ham tanib olinadi. Masalan, pero ekranga yaqinlashtirilsa, foydalanuvchiga qulay bo‘lishi uchun ilova kerakli maydonchani kattalashtirib ko‘rsata oladi. Shuningdek, yangi iPad Pro gadjetlari maksimal tezligi 2,4 Gbit/soniya bo‘lgan Wi-Fi 6E standartini qo‘llaydi, Cellular modellari esa butun dunyo bo‘ylab ko‘plab miqdordagi 5G tarmoqlarida ishlay olishi bilan ajralib turadi.

AQSh uchun narxlari quyidagi ko‘rsatkichlardan boshlanadi:

• iPad Pro 11 Wi-Fi — $800 (8 866 000 so‘m);
• iPad Pro 11 Cellular — $1000 (11 085 000 so‘m);
• iPad Pro 12,9 Wi-Fi — $1100 (12 195 000 so‘m);
• iPad Pro 12,9 Cellular — $1300 (14 414 000 so‘m).

Apple planshetlarga qo‘shimcha tarzda $130 (1 432 000 so‘m) evaziga ikkinchi avlod Apple Pencil hamda $300 (3 318 000 so‘m) narxida g‘ilof-klaviatura taklif etmoqda.

iPad

O‘ninchi avlod bazaviy iPad esa «Home» tugmachasidan xalos bo‘lgan, 10,9 dyuymlik ekrani atrofida simmetrik romga ega. Liquid Retina displeyning aniqligi 2360×1640 pikselga teng. Touch ID tugmachasi esa endi korpusning yuqori qirrasida joylashgan.

Planshetga A14 Bionic chipi o‘rnatilgan, u oldingi avlodiga nisbatan samaradorlikni markaziy protsessor bo‘yicha 20%, grafika bo‘yicha esa 10% oshirish imkonini bergan. Apple ta’kidlashicha, yangi iPad dunyodagi eng ko‘p sotilayotgan Android-planshetdan besh karra tezkorroq. Uni doimiy xotirasi 64 hamda 128 GBlik variantlarda sotishadi. Planshet USB-C porti orqali quvvatlanadi.

iPad tarixida ilk bora old kamera ekranning o‘ng romiga o‘rnatilgan. Bu – o‘ta keng burchakli kamera bo‘lib, aniqligi 12 MP, ko‘rish maydoni esa 122 daraja. Kamera sensori Center Stage funksiyasiga ega, shuning evaziga suratga olinayotgan obyekt harakatlanayotgan bo‘lsayam hamisha ko‘rish hududida bo‘ladi. Takomillashtirilgan asosiy kamera 12 megapiksellik aniqlikda bo‘lib, soniyasiga 240 kadrlik chastota bilan sekinlashtirilgan 4K video olishga qodir. Shuningdek, planshetga qo‘shaloq mikrofon hamda yangicha stereodinamiklar o‘rnatilgan.

Yangi avlod iPad to‘rt xil rangda, doimiy xotirasi hajmiga ko‘ra ikki xil variantda (har birining yana 5G standartli varianti ham bor) sotuvga chiqadi. Ularning AQShdagi narxlari quyidagi ko‘rsatkichlardan boshlanadi:

• Faqat Wi-Fi modulli versiyasi – $450;
• Wi-Fi hamda Cellular modullariga ega versiyasi – $600.