Asaxiyda chiqqan 10 badiiy kitob to'plami

Til bayrami munosabati bilan Asaxiyda chiqqan 10 badiiy kitob to'plamiga chegirma
 

1. Tara Vestover: Talaba

Tara ajabtovur muhitda ulg‘aygan. Dadasi mormon eʼtiqodiga sodiq, dinni hamma narsadan ustun ko‘ruvchi odam. Onasi esa doyalik qilib, giyohlardan damlamalar tayyorlash bilan shug‘ullanadi va har qanday kasallikni, hatto saratonni ham dori-darmonlarsiz davolay olishini daʼvo qiladi. Tara oiladagi boshqa farzandlar kabi tashqi dunyodan ihotalab qo‘yilgan, davlat maktabida o‘qimagan va faqat ota-onasining raʼyiga ko‘ra tarbiya topgan. Lekin unda, akasi Taylerning beqiyos xizmati bilan, taʼlimga nisbatan qiziqish uyg‘onadi va shu narsa uning hayotini butkul o‘zgartirib yuboradi.

2. Den Braun: Raqamli qalʼa 

Bu kitob zamonaviy jahon adabiyotining eng mashhur yozuvchilaridan biri, butun dunyo bo‘ylab 300 milliondan ortiq nusxada kitob sotgan Den Braunning «Raqamli qalʼa» romanidir. Ushbu roman Den Braunning ilk romani bo‘lib, asar shu zahoti Den Braunga butun dunyoga mashhurlikni olib keladi. Bugungi kunda Den Braun «New York Times» nashri tomonidan bir necha bor dunyoning eng mashhur 100 insoni sifatida eʼtirof etilgan va uning asarlari doim dunyodagi yangi bestsellerlar ro‘yxatida eng birinchi o‘rinlarni egallab kelmoqda. Ayni vaqtda yillik 156 million AQSH dollari daromad bilan, Den Braun jahonda eng ko‘p daromad qiladigan yozuvchilardan biri ham hisoblanadi. Uning boshqa bir «Da Vinchi kodi» nomli asari o‘zbek kitobxonlariga yaxshi tanish.

«Raqamli qalʼa» romani adibning ilk romani bo‘lib, asar 1998 yilda yozilgan. Asarning yozilishiga Den Braun hayotda o‘zi guvohi bo‘lgan voqea sabab bo‘ladi. Den Braun o‘zi dars beradigan Universitetdagi talaba do‘stiga elektron pochta orqali hazillashib AQSH prezidentiga suiqasd qilmoqchi ekanligini yozganligidan so‘ng AQSH «Milliy xavfsizlik agentligi» xodimlari tomonidan qo‘lga olinadi. Milliy xavfsizlik agentligi eng sirli agentliklardan biri bo‘lib, uning vazifasi fuqarolarni kuzatib borishdir. Bu vaziyat uni qiziqtirib qo‘yadi va u elektron xavfsizlik haqida asar yozishga qaror qiladi. Uyiga kelib asarni yoza boshlagan paytda elektron pochta orqali virus kelib, kompyuterining qattiq diski kuyib qoladi. Bundan xavotir olgan Den Braun «Milliy xavfsizlik agentligi» va undagi dovyurak razvedkachilar haqida shov-shuvli kitobni chop etadi.

3. Devid Nikolls: Bir kun. Bir muhabbat tarixi

To‘rt yil bitta universitetda o‘qigan ikki inson kelib-kelib bitiruv kuni tanishib qolishi mumkinmi? Albatta, axir charx Emma va Deksterning yo‘llarini aynan shunday g‘aroyib tarzda kesishtirdi. Taqdir ular uchun atagan bu kun, to‘rtburchak qalpoqlar osmonga otilgan, diplomlar tantanali topshirilgan kun katta hayotning boshlang‘ich nuqtasi bo‘ldi. Bitiruvning ertasi ‒ 15 iyul esa Emma va Deksterni yana-da kuchli bog‘lagan, visol va firoqni birlashtirgan moʻjizaviy sanadir. Yanagi yil bu sanada nimalar yuz beradi? Undan keyingi yillardachi? «Bir kun» nomli film uchun asos bo‘lgan ushbu kitob ikki qahramonning har yili 15 iyulda nimalarni boshdan kechirishini tasvirlaydi.

4. Devid Bax, Jon Devid Mann: Latte omili.

Oylikdan oylikkacha yashashdan charchadingizmi? Moliyaviy erkin bo‘lishni istaysiz, ammo ishni nimadan boshlashni bilmaysizmi? Agar shunday bo‘lsa, unda «Latte omili»ni o‘qishingiz kerak.

Badavlat bo‘lmay turib ham boy yashash mumkinmi? Albatta, mumkin. Buning uchun maoshingizni oshirishlarini, lotereyaga yutuq chiqishi yoki kutilmagan xazina topib olishni kutishga hojat yo‘q.

Ko‘pchilik bir umr boshqalarni boy qilish uchun ishlaganini juda kech tushunadi. Natijada o‘zini hech qachon badavlat bo‘lolmaydigan muhtoj odamdek his etib, barcha istaklarini noaniq muddatga ortga suradi...

Ushbu kitob qahramoni ham «Qurbim yetmaydi» deya ko‘p narsada, hatto orzularida ham o‘ziga cheklovlar qo‘ygan. U tasodifan tanishib qolgan keksa barista esa qizga o‘zi o‘ylaganidan ancha badavlatroq ekanini tushuntirib beradi.

5. Ato Hamdam, Leonid Chigrin: Yapon zobiti. Yutaro Todaning asirlikda boshdan kechirganlari 

Bu kitobdan...
• Hech qachon orzularingizdan voz kechmaslikni, davom etishga umid yo‘qdek tuyulsa ham, istagan narsangiz uchun kurashishingiz kerakligini
• Iqtidorli va moslashuvchan bo‘lishni, qiyin vaziyatga tushib qolganingizda taslim bo‘lish o‘rniga muammoga yechim berishni
• Hech qachon kitobni muqovasiga qarab baholamagandek, insonni tashqi ko‘rinishiga qarab baholamaslikni
• Do‘stlikni qadriga yetishni va agar insonning o‘zi yaxshi bo‘lsa unga hayoti davomida yaxshi insonlar yo‘ldosh bo‘lishini
• Oilaning ahamiyatini tushunishni, oila kurashni davom ettirishga va hech qachon umidni yo‘qotmaslikka turtki bo‘lishini bilib olasiz.

6. Jorj Oruell: 1984 

“1984” asarida o‘tgan asrning 80-yillarida Ummoniya (Angliya, Shimoliy va Janubiy Amerika, Avstraliya, Okeaniya, Janubiy Afrikaning umumiy nomi) mamlakatida hukm surgan siyosiy tuzum haqida so‘z boradi. Nom ham aynan voqealar sodir bo‘lgan yildan kelib chiqib tanlangandek. Kitobda tasvirlangan holatlar tarixiy dalillar bilan solishtirib ko‘rilganda esa real makon Sobiq sovet ittifoqi bo‘lgani, ingliz sotsializmi tushunchasi ostida kommunizm nazarda tutilgani, “1984” esa totalitar tuzum avj olgan palla — 1948 yil ekani (shunchaki raqamlarning o‘rni almashtirilgan) haqida o‘quvchida ehtimol paydo bo‘ladi.

7. Svetlana Aleksiyevich: Chernobil tavallosi

Chernobil tavallosi — bu Svetlana Aleksiyevichning kitobi bo‘lib, Chernobil fojiasi haqida ogohlantirilmagani tufayli hodisaning beayb qurboniga aylangan beloruslarning boshdan kechirganlari haqida hikoya qiladi. Aleksiyeevich yuzlab odamlar, jumladan o‘t o‘chiruvchilar, siyosatchilar, shifokorlar, fiziklar va oddiy fuqarolar bilan suhbatlashdi hamda ularning hikoyalari falokat insoniyat uchun qanchalik qimmatga tushganini ochib berdi.

Kitob inson ruhiyatining, irodasining mustahkamligidan kuchli va taʼsirchan dalolatdir. Bu, shuningdek, yadroviy energiya xavfi haqida ogohlantiruvchi hikoya hamdir.

8. Rey Bredberi: Farengeyt bo‘yicha 451º

Hayot tezlashgan, bir xillik tenglik deb ataladigan, odamlar bir-birini eshitmaydigan, fikrlashdan to‘xtagan, hurlik mahv etilgan… Bu jamiyatda kitoblar aql kushandasi sanaladi, taqiqlar tufayli odamlar asta-sekin ulardan voz kechadi, adabiyotdan qo‘rqadi. Ular faqat quloqlaridagi “chig‘anoq”lardan taraladigan maʼnisiz musiqadan mast, reklamalardan sarhush yashaydi.
Kitoblar taqiqlangan yaqin kelajakdagi xayoliy Amerika jamiyati haqida hikoya qiluvchi ushbu asar bosh qahramoni Gay Monteg – o‘t o‘chiruvchi. Nomi o‘t o‘chiruvchi, ammo kitoblarni ular topilgan uylar bilan qo‘shib yoqish uning aʼmolidir. Ammo kuni kelib, u o‘z kasbining to‘g‘riligiga shubhalanib qoldi va asta-sekin fikrlashni istayotganini sezdi, ana shundan boshlangan isyon ortidan u o‘zi yashab turgan jamiyatdagi tutumni, tartibotni savol ostiga ola boshladi. Alaloqibat u o‘zi kabi insonlardan iborat yashirin guruhga qo‘shildi…

9. Javlon Jovliyev: Qo‘rqma 

Roman voqealarini qisqacha so‘zlar bilan ifoda etib bo‘lmaydi. Barchasi shu qadar tig‘izki, shoshirib qo‘yadi. Majoz, obraz, ifoda, o‘t, hech kimnikiga o‘xshamagan lirizmni his qilasiz. Milliyat, sof muhabbat, ko‘rinmas va oshkor fojialar, tarix, bugun va ertaning bir-biriga kavsharlangan halqasi, rostlik daʼvosidagi yolg‘onlar, ruh va qondagi paradokslar sizni o‘tmish va kelajak kuyiga asir qiladi, o‘ylatadi, yig‘latadi va achchiq-achchiq kuldiradi. O‘tgan asr boshida Germaniyada o‘qigan talabalar, ular maslagi va fojiali qismati bugungi yoshlar maqsadi bilan bir taroziga tortiladi.

Roman o‘tgan asrning yigirmanchi yillarida Germaniyada tahsil olgan va sobiq Sovet Ittifoqi tomonidan shafqatsizlarcha qatl etilgan millat yigit-qizlarining xotirasiga bag‘ishlanadi.

10. Jerom Selinjer: Javdarzordagi xaloskor

Asarning bosh qahramoni Holden Kolfild o‘smirlarning sarkashligi, isyoni timsoliga aylanishga ulgurgan. Roman, shuningdek, maʼsumlik, asillik, o‘zlik, yo‘qotish, daxldorlik, intim va tushkunlik kabi murakkab masalalarga ham tegib o‘tadi.

Jerom Selinjer 1919 yil 1 yanvarda Nyu-Yorkda tug‘ilgan va 2010 yil 27 yanvarda Nyu-Hempshir shtati Kornish shahrida vafot etgan. Ikkinchi jahon urushiga safarbar qilingunga qadar “Story” va “The New Yorker” jurnallarida bir necha hikoyalari chop etilgan. Ammo 1951 yil bosilib chiqqan “Javdarzordagi xaloskor” romani uni mashhur qildi. Nashrdan chiqqach 2 oy muddatda ommalashib ketgan romanda 16 yoshli o‘smir yigitning o‘y-xayollari, atrofidagilarning munofiqligi va soxtaliklaridan bezorligi, hayotga bo‘lgan ochiq munosabati yoritilgan. Muallifning o‘zi 1953 yilgi intervyusida romanni qisman avtobiografik deb atagan.

Narxi: 575 000 so'm
Bayram chegirmasida: 299 000 so'm

O'zingiz va yaqinlar uchun badiiy kitoblar to'plamini sovg'a qiling. Buyurtmalar O'zbekistonning istalgan hududiga yetkazib beriladi.