Ўзбекистон обидаларидаги битиклар Андижон

Альбомга киритилган ёзувларнинг асосий қисми биринчи марта ўқилган ва маҳаллий меъморчилик ёдгорликлари тарихини тиклашда фойдаланилган. Биринчи марта ҳомийлар, ҳунармандларнинг исмлари, хронограммалар кўринишида қурилиш саналари аниқланган. Меъморий ёдгорликларидаги ёзувлар араб, форс ва эски ўзбек тилларида ёзилган. Араб тилидаги матнларда асосан Қуръон оятлари ва суралари, ҳадислар, ибодат тартиби ҳақидаги маълумотлар келтирилган. Форс ва эски ўзбек тилида шеърлар, хронограммалар, бағишлов ёзувлари ёзилган. Уларда куфий, сулс, дивони, насх, насталик каби ёзувлар ҳамда турли безак услублари қўлланган. Альбомда тақдим этилган ёдгорликлар орасида Девонабой масжиди, Жомий мажмуаси, Жиддаи Муборак масжиди, Гумбаз мажмуаси, Пансад масжиди, Қипчоққўрғон масжиди, Аҳмадали Махдум масжиди, Холид ибн Валид масжиди, Отақўзи мадрасаси, Қутайба ибн Муслим мақбараси каби ёдгорликларни учратиш мумкин.