Jeyms Fenimor Kuper: Izquvar

Qo'lingizdagi ushbu kitob AQSHda yashab ijod etgan adib Jeyms Fenimor Kuper (1789-1851) qalamiga mansub "The Pathfinder, or The Inland Sea" romanining rus tili orqali (ingliz tilidan rus tiliga Teodor Solomonovich Gris "Следопыт, или на берегах Онтарио" nomi ostida tarjima qilishgan) Erkin Mirobidov tomonidan "Izquvar" nomi ostida tarjima qilingan ko'rinishidir.

Shuni bilingki, badiiy asarni tarjima qilish (ayniqsa, turkiy tillarga mansub bo'lmagan tildan tarjima qilish) shu asarni qaytadan yozish bilan teng qiyinchilikka ega. Shu tildagi iboralarni so'zlarni, jumlalarni yoki maqol-matallarni maromiga yetkazib tarjima qilish juda mushkul ish hisoblanadi. Chunki bunda tarjimondan bevosita eng kamida ikkita xorijiy tilni mukammal bilish, shuningdek, o'sha til egalari - xalqning turmush tarzi, etnografiyasini, madaniyatini va tarixini mukammal bilish talab etiladi. Shuning uchun Erkin Mirobidov ham doimo xalqimizning, ayniqsa, o'quvchi yoshlarimizning tahsin-u tashakkuriga sazovor bo'lgan. Biz ham shular qatorida tarjimon - Erkin Mirobidovdan ushbu xizmatlari uchun behad xursandmiz!

Ushbu asardagi voqealar Shimoliy Amerikada 1759-yilda fransuz-hindu urushi paytida bergan. Dengizchi Charlz Kap o'zining jiyani Mabelga Nyu Yorkdan Ontario ko'li bo'yidagi qal'aga borishga yordam beradi, u yerda otasi serjant Dungam xizmat qiladi. So'nggi bir necha chaqirim masofada ular turli xil sarguzashtlarga duch kelishadi.

Asarda Jasper, Izquvar, Ulkan Ilon - Chingachkuk va boshqa qahramonlarning oqilona va qahramonona harakatlari ulug'lanadi.

Ushbu kitob ilk bor o'zbek tilida 1984-yilda chop etilgan. Bu davrdagi nashrida ayrim so'z va jumlalarning ma'nosi izohlanmagan yoki ruscha soʻzlar, yoki baynalmilal jumlalar orqali berilgan edi. Bu holat bilan biz tarjimonlarni yoki o'sha davr nashriyoti xodimlarini kamsitish fikridan yiroqmiz. Faqat hozirgi davr kitobxonlarining talab va iltimoslariga asosan asar tarjimasiga qo'shimcha iqtiboslar kiritildi va hozirgi o'zbek adabiy tili qoidalari asosida qayta tahrirlandi.