Sidqiy Xondayliqiy: Saylanma

Sidqiy Xondayliqiy XX asr boshi o'zbek adabiyotining iste'dodli vakillaridan bo'lib, uning ijodiy merosi rang-barang an’anaviy she'riyatimizni yangi o'zbek poeziyasi bilan o'ziga xos tarzda bog'laydi. U bir tomondan, «Devoni Sidqiy»dagi g'azallari bilan mumtoz she'riyatimizdagi ishq va go'zallik haqidagi azaliy va abadiy bahsni davom ettirsa, ikkinchi tomondan, zamonasining shiddatli hodisalari izidan borib, mardikorlik voqealari haqida dostonlar yozadi.
Shoirning ijodiy merosi boy va rang-barang. Unda Imom A’zam kabi sahobalar, tarixiy shaxslar haqida bitilgan qiziqarli qissalardan tortib, ayrim zamondoshlarining hajviy qiyofalari mohirona chizilgan voqeiy hikoyalargacha bor.
Kitobga shoirning «Tuhfai Shavkat», «Savg'oti Shavkat», «Mezoni shariat», «Tazkirai Imom A’zam», «Toza hurriyat», «Rabotchilar kelishi», «Rusiya inqilobi» kabi bosma va «Devoni Sidqiy», «Iqtisob», «Sad irshodi mullo Sidqiy», «Parokanda ash’or va maktub» kabi qo'lyozma asarlaridan namunalar tanlab olingan.