Сидқий Хондайлиқий: Сайланма

Сидқий Хондайлиқий ХХ аср боши ўзбек адабиётининг истеъдодли вакилларидан бўлиб, унинг ижодий мероси ранг-баранг анъанавий шеъриятимизни янги ўзбек поезияси билан ўзига хос тарзда боғлайди. У бир томондан, «Девони Сидқий»даги ғазаллари билан мумтоз шеъриятимиздаги ишқ ва гўзаллик ҳақидаги азалий ва абадий баҳсни давом эттирса, иккинчи томондан, замонасининг шиддатли ҳодисалари изидан бориб, мардикорлик воқеалари ҳақида достонлар ёзади.
Шоирнинг ижодий мероси бой ва ранг-баранг. Унда Имом Аъзам каби саҳобалар, тарихий шахслар ҳақида битилган қизиқарли қиссалардан тортиб, айрим замондошларининг ҳажвий қиёфалари моҳирона чизилган воқеий ҳикояларгача бор.
Китобга шоирнинг «Туҳфаи Шавкат», «Савғоти Шавкат», «Мезони шариат», «Тазкираи Имом Аъзам», «Тоза ҳуррият», «Работчилар келиши», «Русия инқилоби» каби босма ва «Девони Сидқий», «Иқтисоб», «Сад иршоди мулло Сидқий», «Пароканда ашъор ва мактуб» каби қўлёзма асарларидан намуналар танлаб олинган.