Qanday noutbuk tanlash kerak?

Noutbuk sizga nima uchun kerak?

Biror ish boshlashdan oldin, undan ko‘zlayotgan asosiy maqsadingizni aniqlashtirib olishingiz kerak, shunda u ishni tugatish oson kechadi. Noutbuk tanlashda ham dastlab uni aynan nimaga mo‘ljallab olayotganingizga aniqlik kiritib oling, bu tanlovni osonlashtiradi.

O‘qish yoki ofis ishlari uchun

Bunday ishlar uchun kuchli noutbuk xarid qilish shart emas. Arzonroq seriyadagi protsessorga ega laptoplardan birini xarid qilishingiz mumkin. Shuni unutmangki, yuqori darajadagi chiplarning eski avlodlari ham mavjud. Misol uchun, Core i7 chipining 4 yoki 5-avlodlari (hozir 10 yoki 11-avlod aktualdir).

Lekin baribir, agar imkoningiz bo‘lsa, yangi avlod chiplariga ega noutbuk xarid qilishni tavsiya qilamiz, chunki ular kuchliroq va quvvatni tejaydi.

Tavsiya qilinadigan xususiyatlar:

• Protsessor: AMD Athlon, Intel Pentium, Celeron, Core i3/i5.

• Tezkor xotira (operativka): 4 GB.

• Doimiy (ichki) xotira: 256 GB HDD, 128 GB SSD.

• Ekran o‘lchami: 14 yoki 15 dyuym.

Albatta, bular – minimal talablar. Agar byudjetingiz kattaroq bo‘lsa, bundan kuchliroq xususiyatlarga ega noutbuk xarid qilishingiz mumkin. 8 GB operativ xotira bo‘lsa – nur ustiga a’lo nur. Doimiy xotira uncha katta bo‘lmagani ham yaxshi: hujjatlar uncha katta joy egallamaydi, videolarni esa katta ehtimol bilan internet orqali ko‘rasiz.

SSD formatli xotira HDD’ga nisbatan qimmatroq bo‘lishi mumkin, lekin tezroq ishlay oladi. Yana batareyaga ham e’tibor berishingizni so‘rab qolamiz. Agar noutbukni ko‘proq ishlatadigan bo‘lsangiz, kattaroq sig‘imli akkumulyatorga ega modelni tanlang.

“Aytishnik”, ya’ni programmistlar – dasturchilar uchun

Bunday vazifalar uchun sizga kuchliroq noutbuk zarur bo‘ladi. Bunda kerakli xususiyatlar zaxirasi bilan bo‘lgani ham yaxshi. Misol uchun, 8 GB xotira ba’zi hollarda sizni qoniqtirishi mumkin, ammo Android Studio kabi dasturlash muhitlarida qurilmangiz zo‘riqib ishlaydi.

Agar siz Intel chiplariga qiziqsangiz, Turbo Boost bor-yo‘qligiga e’tibor bering. Ushbu texnologiya qurilmangiz zo‘riqib ishlayotganda protsessor chastotasini avtomatik ravishda oshiradi, boshqa paytlarda esa energiyani tejashga yordam beradi.

M1 chipiga ega MacBook noutbuklari bilan ham tanishib ko‘ring. Ular Intel chiplariga ega MacBook’larga nisbatan samaraliroq.

Tavsiya qilinadigan xususiyatlar:

• Protsessor: AMD Ryzen 5/7, Intel Core i5/i7, Apple M1.

• Tezkor xotira: 16 GB.

• Ichki xotira: 256 GB SSD.

Dizaynerlar uchun

Adobe Photoshop, Lightroom va shunga o‘xshash platformalarda ishlash uchun ham kuchli noutbuklar kerak bo‘ladi.

Tavsiya qilinadigan xususiyatlar:

• Protsessor: AMD Ryzen 5/7, Intel Core i7, Apple M1.

• Tezkor xotira: 16 GB.

• Doimiy xotira: 516 GB SSD.

Fotograf va dizaynerlar ekranga uzoq vaqt qarashganligi sababli, ekran matritsasining sifati juda muhimdir. MacBook’lar ranglarni aniq-tiniq chiqarib bera oladi, shuning uchun ham ko‘p mutaxassislar aynan ushbu qurilmalarni tanlaydi. Agar sizga kattaroq ekran kerak bo‘lsa, uning yoniga diagonali kattaroq qo‘shimcha monitor qo‘shib olishni tavsiya qilamiz.

E’tibor bering, dizaynerlar uchun noutbuk xotirasi katta ahamiyatga ega. Ba’zi fayllar uchun bulutli saqlash texnologiyalaridan foydalanishingiz mumkin, lekin har doim qo‘l ostingizda bo‘lishi kerak bo‘lgan materiallarni noutbuk xotirasida saqlaysiz.

Montaj ishlari yoki o‘yinlar uchun

Ko‘pchilik odamlar, bunday maqsadlar uchun noutbuklarga nisbatan yig‘ilgan statsionar kompyuter kuchliroq, deyishadi. Bir tomondan bu to‘g‘ri, chunki tizim bloki sizga ko‘proq imkoniyat beradi. Biroq noutbuklar qimmatroq bo‘lgani bilan, mobillikda kompyuterlarni ortda qoldiradi.

Videomontaj va o‘yinlar uchun noutbuk sotib olayotganda nafaqat ekranga, balki boshqa xususiyatlariga (videokarta, xotira, protsessor) ham e’tibor berish kerak.

GeForce MX asosidagi grafik kartalar yangi o‘yinchilar, 3D rassomlar va videomontajchilar uchun mos keladi. GTX 10 (1050, 1060, 1070, 1080) va GTX 16 (1650, 1660) seriyalari jiddiyroq maqsadlar uchun, RTX 20 (2060, 2070, 2080) – rekord darajadagi FPS (sekundiga kadrlar) uchundir.

Protsessor ishlab chiqaruvchisi – faqat afzallik nuqtai nazaridan muhim. Ofis uchun ishlatiladigan protsessorlar umuman to‘g‘ri kelmaydi. To‘rtta yadro soni – bu minimal talab, ammo zaxira bo‘lgani yaxshiroq. Lekin gap faqatgina yadrolar sonida emas. Ishlash tezligi protsessorning avlodiga ham bog‘liq. Misol uchun, eski avlod i7 chiplari yangi avlod i5 chiplaridan ortda qolishi mumkin.

Tezkor va doimiy xotira. Bu yerda ham eski qoida ishlaydi: qancha kuchli bo‘lsa, shuncha yaxshi.

Ekranga keladigan bo‘lsak, ko‘pchilik mutaxassislar bir joyda ishlaydiganlar uchun qo‘shimcha monitor olishni tavsiya qilishadi (bu majburiy emas). IPS yoki MVA matritsasiga ega noutbuk – ayni muddao. Ular ranglarning haqiqiy reproduksiyasini ta’minlashga qodir.

Lekin bu yerda batareyaning ishlash muddati unchalik muhim emas. Bunday kuchga ega deyarli har qanday qurilma 1,5–2 soatgacha ishlashi mumkin. Bu o‘yindagi turnirni yakunlash yoki chiroq o‘chib qolsa loyihangizni saqlab olish uchun yetarlidir.

Quyidagi xatolarni qaytarmang!

1. Faqat byudjetga asoslangan holda tanlash

Ko‘pchilik faqatgina byudjetga asoslanib noutbuk xarid qiladi. Hammasi shundan keyin boshlanadi: o‘yinlar yuklanmaydi, qurilma sekin ishlaydi, batareya ko‘pga yetmaydi.

Tavsiyalar:

• Qaysi model sizni ko‘proq qoniqtirishini aniqlab oling, agar pulingiz yetmasa – yig‘ing. Asosiysi, eng qimmatiga yopishib olmang.

• Ishlatilgan noutbuk xarid qilish – bundaylar asosan yangisiga nisbatan 30–50% arzonroq bo‘ladi. Ammo xarid qilishdan oldin mutaxassisga ko‘rsatib oling, chunki buzilgan bo‘lishi mumkin.

• Muddatli to‘lovga xarid qiling. Agar yoningizda yetarlicha pul bo‘lmasa shu yo‘l qulayroq.

2. Chegirmalarga tayanib qolmang

Agar siz internet-do‘konlar orqali noutbuk qidirayotgan bo‘lsangiz, chegirmalarga ko‘proq e’tibor berasiz. Bundan oldin o‘z maqsadlaringizga to‘g‘ri keladigan noutbuklarni ko‘rib chiqing. Narxlarini esa keyinroq solishtirib ko‘rishingiz mumkin.

3. Eng qimmati – eng yaxshisi degani emas

Bu – eng mashhur stereotip. Agar siz uydan ishga, ishdan uyga qatnaydigan bo‘lsangiz, buzilsa tuzatish qiyin bo‘ladigan retro avtomobil, yoqilg‘isi uchun oylik maoshning hammasi ketib qoladigan qimmat mashina kerak emas. Noutbuklarda ham xuddi shunday. Misol uchun, chiroyli dizaynga ega qimmat noutbuk siz yoqtirgan o‘yinni ko‘tara olmasligi mumkin.

4. Nyuanslarni hisobga olmay, sovg‘aga xarid qilish.

Biror yaqin odamingizga nimalar yoqishini aniqlashtirmasdan turib unga hadya berishingiz – bu eng katta xatolardan biri. Bunday sovg‘a bilan uni xursand qilish qiyin.

Buning oldini olish uchun, barcha nozik jihatlarni avvalroq, uning o‘ziga sezdirmay bilib oling. Misol uchun, xuddi o‘zingizga xarid qilayotgandek ko‘rsatib maslahat so‘rashingiz va unga nimalar yoqishini bilib olishingiz mumkin. Agar u texnikani yaxshi tushunmasa, uning uchun qurilmaning qaysi xususiyatlari muhimligini bilib oling: katta ekran, yuqori sig‘imli batareya yoki “tishlangan olma” rasmi yonib turadigan korpus bo‘lishi.

Agar sizga ushbu maqola yoqqan bo‘lsa, fikringizni izohlarda yozib qoldiring. E’tiboringiz uchun rahmat!