Omina Shenliko'g'li: Ishqqa yengilmayman

Dunyoga kelishining o‘zi kurashdan iborat bo‘lgan odam bolasi to umri oxirlaguniga qadar mudom ikki qutb o‘rtasida muallaq yashaydi. Qaysi tomonni tanlashiga qarab u yaxshi, yomon, noinsof, vijdonli, manfaatparast, olijanob shu kabi sifatlar bilan taniladi. Qo‘lingizdagi asar ham inson qiymatini belgilaydigan tanlov haqida. Bosh qahramon - Yunus xudosizlikdan to Allohni tanishgacha bo‘lgan yo‘lga chiqadi. Safar davomida juda ko‘p qadriyatlari, ishongan va tayangan haqiqatlarini qayta ko‘rib chiqadi, o‘zini tanish iztirobi va lazzatidan bahramand bo‘ladi. Onasi va suygan qizi Asuman uning hayotidagi asosiy ayol insonlardir. Biri Yunusni yengil, ammo xudosiz yashashga undasa, ikkinchisi murakkab, ammo Yaratganni tanish va iymon keltirish baxti bilan sharaflangan hayotga chorlaydi. Bir umr islomni inkor etib kelgan, musulmonlarda tinch hayot va taraqqiyot dushmanlarini ko‘rib kelgan yigit muhabbat tufayli o‘zgarishga ahd qiladi. Asumanning eʼtiboriga tushish uchun dinni o‘rgana boshlaydi, aqlan Allohning borligiga amin bo‘ladi. Tog‘ kiyigidek hurkak va mag‘rur qiz Yunusga qaraydimi? Yunus iymon keltiradimi? Bolalikdan ongiga singdirib kelingan noto‘g‘ri qarashlarni muhabbat sindira oladimi? Dahriy oila eʼtiqodi haëtidan ham muhim bo‘lgan qizni qabul qiladimi?

Omina Shenliko‘g‘lining «Ishqqa yengilmayman» asari bu savollarga javob beradi, sizni o‘ylantirayotgan baʼzi masalalarga yechim taklif qiladi, qanday yashash kerak - o‘zi yashashdan maqsad nima degan falsafiy muammoga butunlay boshqa rakursdan turib yondashadi.