Ibrohim G‘afurov: Adabiyot dunyosi: 8 jildlik

«Ibrohim Gʻofurov» Asarlar va adabiyot dunyosi (1-8 kitoblar)

Adabiyotimizning ulkan vakillaridan biri, atoqli adabiyotshunos olim, mohir adib va tarjimon, jonkuyar publisist Ibrohim Gʻafurov timsolida men butun ongli hayotini milliy ma’naviyatimiz ravnaqiga bag‘ishlab kelayotgan fidoyi shaxs, halol va kamtarin insonni ko‘raman.

Shu o‘rinda bir qiyos keltirmoqchiman.

«Boburnoma» - men vaqt topdim deguncha qayta-qayta o‘qishdan charchamaydigan kitoblardan biridir.

Bobur Mirzo, o‘zining iborasi bilan aytganda, saltanat tashvishi boshiga tushgan kundan to umrining so‘nggi damlariga qadar halovat nimaligini bilmagan. Davlat ishlari, harbiy yurishlar, jangu jadallardan vaqt orttirib, muntazam ijod bilan ham shug‘ullangan. Ulug‘ ajdodimizning biz bugun sevib o‘qiydigan g‘azal va ruboiylari, «Boburnoma» asari ana shunday mashaqqatli mehnat mahsulidir.

Ibrohim aka ham shunday buyuk bobolarimizga xos fidoyilik xususiyatiga ega, o‘z huzur-halovatidan kechib, bir umr odamlarga ilmu ziyo, ma’rifat ulashib kelayotgan hassos so‘z san’atkoridir.

Men Erkin Vohidov, Abdulla Oripov kabi mashhur shoirlarimiz bilan qadrdon edim. Ular bilan ko‘p suhbatlashib, o‘zim uchun doimo ma’naviy kuch-quvvat olardim.

Bir kuni Erkin aka bilan ona tilimiz haqida so‘zlashib qoldik. Shunda, hech esimdan chiqmaydi, Erkin aka bir gap aytdi: «Agar kimda-kim o‘zbek tilining bor jozibasi, tarovatini his etmoqchi bo‘lsa, Ibrohim Gʻafurovga murojaat qilishi kerak». Bu gapni Erkin Vohidov chin yurakdan, mehr bilan ta’kidladi. Bu fikrda chuqur ma’no bor, deb o‘ylayman.

Chindan ham, Ibrohim aka bilan bir marta suhbatlashgan yoki u kishining asarlarini, tarjimalarini mutolaa qilgan kishi bunga amin bo‘ladi.

Jizzax viloyatida hokim bo‘lib ishlagan davrimda, 1996 - 2001 yillarda rahmatli Abdulla Oripov bilan Zomin seminarini tashkil etish bo‘yicha birgalikda ko‘p ishlaganmiz, bu yo‘lda barcha qiyinchilik, mashaqqatlarni birga tortganmiz.

Hudoga ming shukr, men milliy adabiyotimizni rivojlantirish bilan bog‘liq ko‘p orzu-niyatlarimga erishdim. Tashkil etilganiga talay yillar bo‘lsada, o‘zining muqim joyiga ega bo‘lmagan Yozuvchilar uyushmasi ham meni doimo o‘ylantirardi.

Mana, bugun shoir-yozuvchilarimiz ham o‘z «vatan»lariga ega bo‘lishdi - Uyushma uchun poytaxtimizning qoq markazida alohida bino qurib berdik. Qalam ahli uchun uy-joylar, yangi ijod uylari barpo qilindi.

Biz nega Adiblar xiyobonini bunyod etdik? Buning boisi shuki, bu dargohga qadam qo‘ygan har bir inson adabiyotimizning zabardast namoyandalari, o‘tgan ulug‘ shoir-yozuvchilarimiz siymosida xalqimizning yuksak ma’naviy qudratini his etadi.

Ibrohim Gʻafurov o‘zining beqiyos ijodiy va ijtimoiy faoliyati bilan el-yurtimizga juda katta xizmat qilgan ulug‘ zamondoshimizdir. Ishonamanki, u kishi bundan keyin ham o‘zining yangi-yangi, go‘zal va barkamol asarlari bilan barchamizni, butun xalqimizni xushnud etadi.

Prezident Shavkat Mirziyoyevning O‘zbekiston qahramoni Ibrohim Gʻafurov haqidagi fikirlari