Hasanxon Yahyo Abdulmajid: Xatmi Qur'onga marhabo

Bugungi kunda yurtimizda o‘tkazilayotgan xatmi Qurʼonlar ko‘p jihatdan namunali va go‘zal tarzda ado topmoqda. Shu bilan birga, bu ibodatni endilikda yuqori ilmiy saviyada, bilim va hujjat asosida, yana-da mukammal, yana-da manfaatli shaklda o‘tkazish bugungi kunning dolzarb masalalaridan biri bo‘lib turibdi. Xususan, qorilarimiz bu maʼnoda o‘z ustilarida yana ham ko‘proq ishlashlari, Qurʼoni Karimning tajvidini, uning maʼnolarini, axloqu odobini ham puxta egallashga harakat qilishlari lozim. Qurʼonni go‘zal suratda, harf va kalimalarini dona-dona qilib, muhabbat bilan qiroat qilish har bir qorining Qurʼon oldidagi burchidir. Shu bilan birga, qorilarimiz Qurʼonni qiroat qilishda qanchalik yaxshi namuna ko‘rsatsalar, unga amal qilishda ham ana shunday o‘rnak bo‘la olishlari darkor.

Xatmi Qurʼonda ishtirok etayotgan har bir musulmon kishi Qurʼonga nisbatan odob bilan, ixlos bilan munosabatda bo‘lishi dinimiz talablaridandir. Qurʼon qiroatini tinglash bilan birga uning maʼnolarini o‘rganishga ham harakat qilish lozim. Yurtimizda ulamoi kiromlarimiz tomonidan ona tilimizda yozilib, nashr etilayotgan tafsirlarni o‘qib, ilohiy o‘gitlardan bahramand bo‘lib borsalar, har kungi o‘qiydigan, tinglaydigan suralarining qisqacha mazmuni bilan tanishib borsalar, juda ham ulkan ajru savoblarga, foydalarga ega bo‘ladilar, inshaalloh.

Allohga shukrlar bo‘lsinki, hozirgacha yurtimizda Qurʼoni Karimga doir bir qator kitoblar chop qilinib, xalqimiz qo‘liga yetib bordi. Ammo yuqorida biz so‘z yuritgan mavzu – xatmi Qurʼon haqida haligacha biror maxsus asar yo‘q edi. Yosh tadqiqotchilarimizdan Hasanxon Yahyo Abdulmajid tarafidan tayyorlangan ushbu «Xatmi Qurʼonga marhabo!» nomli kitob bu boradagi birinchi qadam bo‘ldi. Risola juda ham ravon, lo‘nda tili va xalqchilligi bilan ajralib turadi. Unda juda ko‘p qimmatli maʼlumotlar o‘rin olgan. Ayniqsa, xatmi Qurʼon duosiga doir satrlar hech kimni befarq qoldirmasa kerak. O‘ylaymizki, bu kitob avvalo qorilarimiz uchun, qolaversa, barcha mo‘min-musulmonlar uchun ajoyib qo‘llanma bo‘lib xizmat qiladi.

Alloh taolodan o‘tinchimiz – hofizi Qurʼonlarimiz yana ham ko‘payaversin, ularning sharofatlaridan yurtimiz yana-da osuda bo‘lib, xalqimizning ichu tashi ilohiy kalom nuri bilan munavvar bo‘lib boraversin!

O‘zbekiston musulmonlari idorasi raisi, muftiy Usmonxon Alimov

Mundarija

• Taqdim

• «Xatmi Qurʼonga marhabo!» kitobiga taqriz

• Muqaddima

• «Xatmi Qurʼon»ning maʼnosi nima va u qanday amal?

• Qurʼonni xatm qilish qachon boshlangan?

• Qurʼonni qancha muddatda xatm qilish kerak?

• Salafi solihlar hayotidan namunalar

• Xatm yetkazish uchun nimalarga eʼtibor berish lozim?

• Xatmi Qurʼonning foydalari va undan ko‘zlangan maqsadlar

• Xatmi Qurʼon odoblari

• Xatmi Qurʼonda takbir aytish masalasi

• «Xatmi sag‘ir» haqida

• Xatmi Qurʼondagi basmala masalasi

• Xatmda unutib qoldirilganoyatlarni qanday to‘ldiriladi?

• O‘tganlarga xatmi Qurʼon bag‘ishlash haqida

• Xatmi Qurʼonda duo qilish

• Ahli Qurʼon do‘stlarga ko‘ngil nidosi

• Tinglovchilarga murojaat

• O‘tmishdan namunalar

• Xatmi Qurʼon duosi