Tara Vestover: Talaba

Tara ajabtovur muhitda ulgʻaygan. Dadasi mormon eʼtiqodiga sodiq, dinni hamma narsadan ustun koʻruvchi odam. Onasi esa doyalik qilib, giyohlardan  damlamalar tayyorlash bilan shugʻullanadi va har qanday kasallikni, hatto saratonni ham dori darmonlarsiz davolay olishini daʼvo qiladi. Tara oiladagi  boshqa farzandlar kabi tashqi dunyodan ihotalab qoʻyilgan, davlat maktabida oʻqimagan va faqat ota-onasining raʼyiga koʻra tarbiya topgan. Lekin unda, 
akasi Taylerning beqiyos xizmati bilan, taʼlimga nisbatan qiziqish uygʻonadi va shu narsa uning hayotini butkul oʻzgartirib yuboradi.

Vestoverlar oilasi koʻp farzandli ekaniga qaramay, maktab avtobusi ularning xonadonini chetlab oʻtadi. Buning jiddiy sababi bor: u oilada hech kim maktabga bormaydi. Mutaassib ota va u chizgan chiziqdan chiqmaydigan ona davlat taʼlimiga “miyani yuvish” vositasi sifatida qarab, farzandlarini uyda  olib oʻtirishga, ularni mormon qadriyatlariga muvofiq tarbiyalashga tish-tirnogʻi bilan harakat qiladi. Yetti nafar bolaning toʻrttasida hatto tugʻilganlik haqida guvohnoma hamyoʻq. Shunday biqiq va gʻalati muhitda tugʻilgan Taraning kelajagi goʻyo oldindan tayin edi: mormon qadriyatlariga mos ravishda tarbiya topib, ulgʻaygach, onasi kabi doya boʻlib yetishishi va mormon yigitga turmushga chiqishi kerak edi. Ammo taqdir charxpalagi tamoman teskari aylanib, ilmga chanqoq bu qizning hayoti butkul oʻzgarib ketadi.
 

Tara Vestoverning “Talaba” asari uning ilm yo‘lidagi sayohatini jonli tarzda tasvirlab beradi. Tara Vestover oʻz hikoyasi orqali chidamlilik va taʼlim kuchini koʻrsatadi hamda oʻtmish qoliplaridan chiqib oʻzni qayta kashf qilishga ilhomlantiradi.

“Ajoyib hikoya va haqiqatan ham ilhomlantiruvchi. Bu siz eshitganingizdan ham yaxshiroq.“
- Bill Geyts

“Yurakni larzaga keltiruvchi. . . taʼlimning koʻzni ochish va hayotni oʻzgartirish qudrati haqida ajoyib vasiyat.“
- Emi Chua, The New York Times Book Review

Ushbu kitob Xalq banki bilan hamkorlikda chop etildi.