Ulug‘bek Hamdam: Bizdan rozi bo'ling, ota

Odatda biror kitobga annotatsiya yozar ekanmiz, yozuvchining mahoratiyu asarning tarbiyaviy ahamiyati haqida to‘xtalamiz. Bu gal yondashuvni o‘zgartirib, savol bilan boshlaymiz. Xo‘sh, o‘quvchi nega qimmatli vaqtini sarflab, ushbu kitobni mutolaa qilishi kerak? Javob ham shu o‘rinda topiladi.

Birinchi sabab yozuvchining mashhurligi, muallifning bundan avvalgi kitoblari nafaqat o‘quvchilar, balki adabiy tanqidchilar tomonidan ham juda iliq kutib olingan. Tili, uslubi, zamon va makon tushunchalari o‘quvchini, so‘zsiz, «asir oladi».

Ikkinchi sabab - mavzuning originalligi. Ijtimoiy yengil-yelpilikdan uzoqligi asar nomidan ham bilinib turibdi: “Ota”, «barcha otalarga bag‘ishlanadi». Demak, otalik hisi, otalik burchi, otalik hukmi, otalik so‘zi...

Uchinchi sabab - ushbu kitobga kirgan romanlarning hajmi. Kitob katta emas, ammo undan ikkita zabardast asar o‘rin olgan. Har ikkala roman, aytish mumkin bo‘lsa, yozuvchi ijodidagi yetuklik payti dunyoga kelgan. Yangi davr adabiyoti.

Aybdorlik hisi, iztirob, armon, taskin hamda so‘zsiz va sassiz faryodlar aks etgan roman, deya izohlangani bejiz emas. Kitobni sovuqqonlik bilan, sokinlik bilan o‘qish qiyin. Mushohada va tahlil kitobxonni bir muddat tinch qo‘ymaydi...

Mutolaadan keyin mehribon, jonkuyar, ammo gunohkor ota haqidagi ushbu romanni yaqinlaringizga tavsiya etar ekansiz, to‘rtinchi sabab, sizda, albatta, bo‘ladi.

So‘zboshi mualliflari: Umarali Normatov, Hamidulla Boltayev