Odinaxon Muhammad Sodiq: Qizlarjon...

«Qizlarjon...»

BISMILLAHIR ROHMANIR ROHIYM

So‘zboshidan

Alloh subhanahu va taolo tuproqdan Odamni yaratib, unga O‘z huzuridagi ruhdan jon puflab, uni O‘zining yerdagi o‘rinbosari qildi. So‘ngra Odamning juftini yaratdi va ularning ikkovidan yer yuziga erkak va ayollarni taratdi. Alloh taolo inson zotini juft holda – erkak va ayol qilib yaratar ekan, ularning har biriga o‘ziga xos xususiyatlarni berdi va ularning nikoh orqali halol-pok yashab, zurriyotlar qoldirishlarini va shu tarzda inson naslini davom ettirishlarini iroda qildi.

Alloh taolo ayolni erkak uchun juft, sakinat topish vositasi, hayot mashaqqatlarini yengishda hamkor, sherik qilib yaratgan. Shuning uchun Islom dini ta’limotlari ayol zotining sharafini yuksaklarga ko‘tardi, uning sha’n-obro‘sini qattiq himoya qildi, ayolning inson zotining davomchisi sifatidagi barcha haq-huquqlarini belgilab berdi.

Alloh taolo yer yuzini Islom dini bilan munavvar qilgan paytda butun dunyo jaholat botqog‘iga botgan edi. Barcha yurtlarda johillik, adolatsizlik, zulm va jabru sitam hukm surardi. Ayniqsa, ayollarga xos masalalarda bu salbiy ishlar cho‘qqisiga chiqqan edi. Ayol kishi o‘ziga tegishli bo‘lgan, Alloh taolo belgilab bergan barcha insoniy haq-huquqlardan mahrum qilingan edi. Ayolni hatto odam o‘rnida ko‘rmaydigan toifalar ham bor edi...

...Islom dini mukammal ilohiy tuzum o‘laroq, dunyodagi mavjud barcha nuqsonlarni, jumladan, insoniyatning nafis qismi sanalmish ayollarga bo‘lgan munosabatdagi mavjud nuqsonlarni ham tuzatishga kirishdi. Buning uchun johiliyatning ayol zotiga bo‘lgan munosabati qattiq qoralandi. Qur’oni Karim johiliyat ahlining ayol zotiga nisbatan adolatsizligini tanqid qilish bilan kifoyalanib qolmadi, balki ularning bu ishlaridan qiyomatda so‘ralajaklari, qilmishlarining jazosini albatta tortishlari haqida xabar berdi. Ayolga qilingan tuban munosabatlar, unga yetkazilgan turli zulm va zararlarning misoli bir qancha sura va oyatlarda zikr qilingan.

Eng muhimi, Islom dini dunyoda birinchi bo‘lib ayol zotini ulug‘lash borasida kurash boshladi, jamiyatlarni ayolni ehtirom qilishga undadi. Haqiqatan, o‘sha davrda ayollarning insonlik huquqlarini himoya qiladigan Islomdan boshqa biror tuzum yoki ta’limot yo‘q edi. Ana shunday bir paytda Islom ayol zotining ham to‘laqonli inson sifatida, Alloh taolo mukarram etgan inson sifatida o‘z haqqiga ega bo‘lishi uchun kurash boshladi. O‘sha paytda nozil bo‘lgan oyati karimalar ayol haqidagi islomiy ta’limotlarni bayon qilish bilan birga, ayol zotini yerga uruvchi johiliy urf-odatlar va qonun-qoidalarni chilparchin qilib tashlar edi.

Odinaxon Muhammad Sodiq